काठमाडौं । ललिता निवास जग्गा प्रकरणमा जोडिएका पूर्वमन्त्री चन्द्रदेव जोशी साधारण तारेखमा रिहा भएका छन् । सोमबार विशेष अदालतमा हाजिर भएका पूर्वमन्त्री तथा नेकपा (संयुक्त) का अध्यक्ष जोशीलाई अदालतले साधारण तारेखमा छोड्न आदेश दिएको हो ।
सो प्रकरणमा अख्तियार दुरुपयोग अनुसन्धान आयोगले जोशीविरुद्ध ७ करोड ८ लाख बिगो कायम गरि मुद्दा चलाएको हो। जोशीको पक्षमा वरिस्ठ अधिवक्ता कृष्ण प्रसाद भन्डारी, भिमार्जुन आचार्य, ललित बस्नेत, जगत प्रकाश जोशी र जयदेव जोशीसमेतले बहस गरेका थिए ।
बालुवाटारस्थित ललिता निवासको सरकारी जग्गा व्यक्तिका नाममा दर्ता गर्न संलग्न रहेको अभियोगमा तीन पूर्वमन्त्रीसहित १७५ जनाविरुद्ध भ्रष्टाचार मुद्दा दायर गरिएको थियो ।
सो प्रकरणमा पूर्व उपप्रधानमन्त्री विजयकुमार गच्छदार, पूर्व भूमिसुधारमन्त्री चन्द्रदेव जोशी र डम्बर श्रेष्ठ, पूर्वसचिवहरु छविराज पन्त, दिनेशहरि अधिकारी र दीप बस्न्यात तथा भाटभटेनी सुपरमार्केटका सञ्चालक मीनबहादुर गुरुङसमेत मुछिएका छन् ।
गच्छदारविरुद्ध ९ करोड ६५ लाख, पूर्वमन्त्री श्रेष्ठविरुद्ध ९ करोड ६५ लाख, अख्तियारका तत्कालीन प्रमुख आयुक्त बस्न्यातसँग ९ करोड ६५ लाख बिगो मागिएको छ ।
सरकारले अधिग्रहण गरेको ललिता निवासको २८४ रोपनी जग्गामध्ये १ सय १२ रोपनी जग्गा व्यक्तिका नाममा दर्ता गरी हिनामिना गरिएको छानबिनले देखाएको छ ।
