काठमाडौं । चितवनमा आइतबार भएको २२ संगठनको विरोध प्रदर्शनबाट सहयात्री राष्ट्रिय जागरण मञ्चका नेतालाई प्रहरीले पक्राउ गरेको छ । भरतपुरको चौबिसकोठीमा आयोजित विरोध कोणसभालाई सम्बोधन गरेलगत्तै मञ्चका प्रतिनिधि प्रकाश ढकाललाई सादा पोसाकका प्रहरीले गिरफ्तार गरेको हो ।
भरतपुरमा दिउँसो १ बजे चितवन मेडिकल कलेज (सीएमसी) अगाडिको चौताराबाट जुलुश प्रदर्शन गरी चौबिसकोठीमा पुगी कोणसभामा परिणत भएको थियो । कोणसभा सञ्चालन भइरहेका बेला ढकाललाई प्रहरीले गिरफ्तार गरेको राष्ट्रिय जनमोर्चाका केन्द्रीय सचिव एवम् चितवन जिल्ला अध्यक्ष डम्बर पुरीले जानकारी दिनुभयो ।
‘ढकालजी बोलेलगत्तै चौबिसकोठी चोकबाटै सादा पोसाकका प्रहरीले गिरफ्तार गरेका हुन्’ पुरीले भन्नुभयो, ‘उहाँको रिहाईको माग गर्दै हामीले हिजै प्रमुख जिल्ला अधिकारी नारायणप्रसाद भट्टराईलाई भेट्यौँ । तर, उहाँसँग शंकास्पद बस्तु भेटिएको भन्दै अनुसन्धान नगरी छोड्न नमिल्ने प्रशासनले जवाफ दिएको छ ।’
आइतबार चितवनको टाँडीचोकमा बम फेला परेको थियो । सो बमलाई नेपाली सेनाको बम डिस्पोजल टोलीले निस्क्रिीय बनाएको थियो । विप्लव नेतृत्वको नेकपाले सो बम राखेको प्रशासनको आशंका छ । सोही घटनाबारे अनुसन्धान गर्न प्रकाश ढकाललाई नियन्त्रणमा लिइएको प्रशासनले जनाएको छ ।
यसैबीच चितवनमा क्रियाशील ६ वटा राजनीतिक दलहरुले आइतबार विज्ञप्ति प्रकाशित गरी ढकालको अबिलम्ब सकुशल रिहाइ गर्न माग गरेका छन् ।
नेकपा (मसाल) सहित २२ राजनीतिक दल तथा संगठनले आइतबार देशभर एमसीसीको खारेजी, अतिक्रमित भूमि फिर्ता, महंगी नियन्त्रण, भ्रष्टाचारको विरोध लगायतका विषय समेटी विरोध प्रदर्शन गरेका थिए ।
चितवनमा भएको विरोध सभालाई राजमो सचिव डम्बर पुरीसहित नेकपा (मसाल) का जिल्ला प्रवक्ता मेघराज ढकाल, नेकपा (क्रान्तिकारी माओवादी) का जिल्ला सेक्रेटरी अशोक शर्मा, देशभक्त जनगणतान्त्रिक मोर्चाका बाबुराम प्यासी, नेकपा (माले) का जिल्ला सचिव परशुराम लामिछाने, राष्ट्रिय जागरण मञ्चका प्रकाश ढकाल र वैज्ञानिक समाजवादी कम्युनिष्ट पार्टीका गोविन्द विकले सम्बोधन गर्नुभएको थियो ।
