गिरीप्रसाद बुढामगर
वीरेन्द्रनगर । २२ दलको आयोजनामा एमसिसीलगायत असमान सन्धिसम्झौताको खारेजी, कालापानी–लिपुलेक–लिम्पियधुरालगायतको देशको अतिक्रमित भूमि फिर्ता, कालापानिबाट भारतीय सेना फिर्ता, भ्रष्टाचार, महङ्गीको विरोध आदि विषयमा सुर्खेतको वीरेन्द्रनगरको मङ्लगढीचोकमा २०७७ मङ्सिर ७ गते विरोध प्रदर्शन गरिएको छ ।कार्यक्रममा माथिल्लो कर्णाली बचाऔँ राष्ट्रिय अभियानका केन्द्रीय

सचिव कमलविक्रम शाही, नेकपा (क्रान्तिकारी–माओवादी) का सुर्खेत जिल्ला सचिव श्याम कार्की, नेकपा (मसाल) का प्रतिनिधि विष्णुप्रसाद शर्मा, राष्ट्रिय जनमोर्चा कर्णाली प्रदेशका अध्यक्ष भरतबहादुर शाही, नेकपा (क्रान्तिकारी–माओवादी) का दिपक शाहीलगायतका वक्ताहरूले सम्बोधन गर्नुभएको थियोे ।

यसै क्रममा राष्ट्रिय जनमोर्चा कर्णाली प्रदेशका अध्यक्ष भरतबहादुर शाहीले देशविदेशमा यो सरकारलाई कम्युनिस्टको सरकार भनेर हल्ला फिजाइएको अवस्थामा के यो देशमा साँच्चै कम्युनिस्टको सरकार छ त भन्ने प्रश्न गर्दै यो सरकारले मल बिउजस्ता किसानको आधारभूत आवश्यकता परिपूर्ति गर्न नसक्ने, गरिब मजदुरको हितमा काम गर्न नसक्ने माफिया ,भ्रष्टाचारी र विदेशी दलालहरूको हितमा काम गर्ने सरकार हो भन्नुभयो ।

त्यसैगरी अर्का वक्ता नेकपा (मसाल) सुर्खेतका प्रतिनिधि विष्णुप्रसाद शर्माले यो आन्दोलन कुनै दलविशेषको आन्दोलन नभई राष्ट्रियताको रक्षा गर्ने आम नेपालीको आन्दोलन हो भन्दै महङ्गी, भ्रष्टाचारलगायतका विषयहरूमा सम्पूर्ण जनता एकजुट भएर आन्दोलन गर्नुपर्छ भन्नुभयो ।

कार्यक्रमको सञ्चालन राष्ट्रिय जनमोर्चा जिल्ला समिति सुर्खेतका सचिव लालबहादुर नेपालीले गर्नुभएको थियो ।