काठमाडौं । सत्तारुढ दल नेकपाको आन्तरिक कलह नेताहरुमाथि दुर्व्यबहारदेखि व्यक्तिगत गालीगलौजमा परिणत हुँदै गएको छ । शनिबार पार्टीका स्थायी समिति सदस्य सुरेन्द्र पाण्डेमाथि चितवनमा भएको दुर्व्यबहारप्रति दुवै खेमाका नेता कार्यकर्ताहरुले एक आपसमा घोचपेच गरिरहेका छन् ।

पूर्वमन्त्री पाण्डे उपस्थित नेकपाको चितवनस्थित राप्ती नगरपालिकाको बैठकमा पाण्डेविरुद्ध अध्यक्ष केपी शर्मा ओली पक्षधर कार्यकर्ताहरुले नाराबाजी गरेका थिए । सो विरुद्ध पार्टीका वरिष्ठ नेताहरु माधवकुमार नेपाल, झलनाथ खनाल, प्रवक्ता नारायणकाजी श्रेष्ठलगायतले वक्तव्य नै प्रकाशित गरी आलोचना गरेका छन् ।

प्रवक्ता श्रेष्ठले ट्वीटरमा घटनाबारे उल्लेख गर्दै लखेका थिए, ‘यस प्रकारको व्यवहारलाई प्रोत्साहित गरेर कम्युनिष्ट आन्दोलनको मात्रै होइन, कसैको पनि हित गर्दैन। चेत होस् ।’

प्रवक्ता श्रेष्ठले ओली पक्षमाथि लगाएको आरोपप्रति प्रधानमन्त्री ओलीका प्रेस सल्लाहकार सूर्य थापाले ‘गुटगत अन्तरदृष्टि’ भन्दै कडा जवाफ दिएका छन् ।

बुटवलमा मुख्यमन्त्री शंकर पाेखरेलले चढ्नुभएकाे गाडीमाथि ढुंगाप्रहार गरिंदा निदाउनुभएकाे थियाे क्यारे ! चितवनमा पार्टी एकता जिन्दावादकाे नारा लगाउँदा सुनियोजित दुर्व्यवहार देख्नुभएछ – गज्जब छ गुटगत अन्तर्दृष्टि र छनाेटपूर्ण वक्तव्यबाजी ! दुबै स्थायी कमिटी सदस्य- तब न नारायणकाजी ! pic.twitter.com/VlS6Lqjmou

— Surya Thapa (@ThapajiSurya) November 22, 2020

थापाले लेखेका छन्, ‘बुटवलमा मुख्यमन्त्री शंकर पोखरेलले चढ्नुभएको गाडीमाथि ढुंगाप्रहार गरिँदा निदाउनुभएको थियो क्यारे ! चितवनमा पार्टी एकता जिन्दावादको नारा लगाउँदा सुनियोजित दुर्व्यवहार देख्नुभएछ । गज्जब छ गुटगत अन्तर्दृष्टि र छनोटपूर्ण वक्तव्यबाजी ! दुवै स्थायी कमिटी सदस्य– तब न नारायणकाजी !