काठमाडौँ । राष्ट्रपति चुनावमा होमिएको अमेरिकामा कोरोना सङ्क्रमितको सङ्ख्या दैनिक दुई लाख पुग्ने सम्भावना देखा परेको छ । पछिल्लो चौबिस घण्टाको तथ्याङ्क हेर्दा यस्तो सम्भावना देखा परेको हो ।
वल्र्डोमिटर्सका अनुसार त्यहाँ पछिल्लो चौबिस घण्टामा मात्रै एक लाख ७९ हजार २९१ नयाँ सङ्क्रमित थपिएका छन् । त्यससँगै त्यहाँ कुल सङ्क्रमितको सङ्ख्या एक करोड १० लाख ५९ हजार ८२७ पुगेको छ ।
यस अवधिमा एक हजार ३६८ जना मृतक थपिएसँगै कुल मृतकको सङ्ख्या दुई लाख ४९ हजार ९४८ पुगेको छ ।
६७ लाख ८१ हजार ९८३ जना सङ्क्रमित निको भएर गइसकेको अमेरिकामा सक्रिय सङ्क्रमित ४० लाख २७ हजार ८९६ रहेका छन् । त्यसमध्ये गम्भीर प्रकृतिको बिरामी ३२ हजार ८२ रहेका छन् ।
यसअघि हिजो बिहानसम्मको चौबिस घण्टामा एक लाख ६२ हजार २२६ जना तथा अस्ति बिहानसम्मको चौबिस घण्टामा एक लाख ४४ हजार नयाँ सङ्क्रमित थपिएका थिए ।
अमेरिकाको जनसङ्ख्या ३३ करोड १७ लाख २२ हजार १७० को हाराहारीमा छ ।
आज बिहानसम्म विश्वभरिमा पाँच करोड ३७ लाख २२ हजार ९२८ जना कुल सङ्क्रमितको सङ्ख्या पुगेको छ । पछिल्लो चौबिस घण्टामा छ लाख ४७ हजार दुई सय जना नयाँ सङ्क्रमित थपिएका छन् । यस अवधिमा नौ हजार ८६३ जना मृतक थपिएसँगै कुल मृतकको सङ्ख्या १३ लाख आठ हजार ४८६ पुगेको छ ।
अहिलेसम्म विश्वभरिमा तीन करोड ७४ लाख ९० हजार ८२४ जना कोरोना सङ्क्रमित निको भएर घर फर्किसकेका छन् । एक करोड ४९ लाख २३ हजार ६१८ जना सक्रिय सङ्क्रमित रहेका छन् भने एक लाख नौ हजार १५८ जना गम्भीर बिरामी रहेका छन् ।
