काठमाडौं । नेपाल कम्युनिष्ट पार्टी (मसाल) का महामन्त्री मोहनविक्रम सिंहले कालापानी लगायतका अतिक्रमित क्षेत्र भारतलाई सुम्पन सरकार तयार भएको त होइन, भन्ने गम्भीर आशंका व्यक्त गर्नुभएको छ । पछिल्ला गतिविधिले सरकार राष्ट्रियप्रति भारतसँग सौदाबाजी गरिरहेको स्पष्ट भएको भन्दै सिंहले कालापानीको अडानबाट सरकार पछि हटेको आरोप लगाउनुभएको हो ।

शुक्रबार साँझ युगदर्शनका सम्वाददाताहरुको प्रशिक्षण कार्यक्रममा बोल्दै महामन्त्री सिंहले भारतीय गुप्तचर संस्था ‘रअ’ का प्रमुख सामान्तकुमार गोयल र भारतीय स्थल सेनाध्यक्ष मनोजमुकुन्द नरवणेसँग सरकारको वार्ता शंकास्पद रहेको बताउनुभयो ।

‘रअ प्रमुख र भारतीय आर्मी चिफसँग के विषयमा वार्ता भयो, त्यो रहश्यमय छ’ महामन्त्री सिंहले भन्नुभयो, ‘सरकारका गतिविधिले कालापानीमाथिको अडानबाट भाग्न खोजेको देखिन्छ ।

सिंहले कालापानी अतिक्रमणले भारत अन्तर्राष्ट्रिय जगतमा बदनाम भइरहेको स्पष्ट पार्दै त्यो भूमि भारतलाई नै सुम्पन सरकारलाई सहमत गराएको त होइन ? भनि प्रश्न पनि गर्नुभयो ।

यस्तै उहाँले नेपालले चीनसँग ब्यापार पारवहन सम्बन्ध स्थापित गरेपछि भारतलाई असह्य भएको बताउनुभयो ।

‘चीनसँग नेपालले सम्बन्ध तोडोस् भन्ने भारतीय चाहना छ’ सिंहले भन्नुभयो, ‘रअ प्रमुख र आर्मी चीफको नेपाल भ्रमणमा त्यस विषयमा पनि कुरा भएको हुनसक्छ ।’

महामन्त्री सिंहले भारतले नेपालमा हिन्दुराज्य र राजतन्त्र स्थापना गर्न चाहेको बताउनुभयो । राष्ट्रियता, गणतन्त्र र धर्मनिरपेक्षता विरुद्ध भारतले चलखेल गरिरहेको उहाँको भनाई थियो ।

फरक प्रशंगमा महामन्त्री सिंहले कोरोना भाइरसका कारण विभिन्न देशबाट स्वदेश फर्किएका लाखौं नेपाली स्वदेशमा रोजगार नपाएपछि जोखिम मोलेर फेरि तिनै मुलुकमा फर्कन बाध्य भएको बताउनुभयो । कोरोना संक्रमणका कारण पुरै विश्वको अर्थतन्त्र प्रभावित बनेको उल्लेख गर्दै उहाँले संसारभर छरिएर रहेका नेपालीहरु पनि प्रभावित बनेको र भारत, मलेसिया, खाडी जस्ता नेपालीहरु ठुलो संख्यामा रहेका देशहरुमा झन् बढी पीडित बनेको बताउनुभयो ।

उहाँले कोरोना संक्रमणलाई कतिपयले कमाउने मौकाको रुपमा लिएर भ्रष्टाचार गरिरहेको र सरकारले उनीहरुको संरक्षण गरेको आरोप पनि लगाउनुभयो ।

कार्यक्रममा युगदर्शनका अध्यक्ष आनन्द शर्माले युगदर्शनले पार्टीको पक्षमा खेलेको भूमिकाबारे प्रकाश पार्दै यसको समग्र अवस्थाको बारेमा सम्वाददाताहरुलाई स्पष्ट पार्नुभएको थियो भने सम्पादक विद्यानाथ अधिकारले पत्रकारिताको विषयमा प्रशिक्षण दिनुभएको थियो ।

ब्यवस्थापक हरिकान्त शर्माको अध्यक्षता र प्रकाश थापामगरको सञ्चालनमा अघि बढेको प्रशिक्षण कार्यक्रममा देश तथा प्रवासबाट जोडिनुभएका सम्वाददाताहरुले विभिन्न विषयमा जिज्ञासा राख्नुभएको थियो । भर्चुअल माध्यमबाट भएको कार्यक्रमको प्रविधि संयोजन प्रगतिशील लेखक संघका महासचिव समिर सिंहले गर्नुभएको थियो ।