काठमाडौं । नेकपा (मसाल) का तत्कालिन प्रवक्ता रहेका दिनानाथ शर्माले पार्टी फुटाउन माओवादीबाट पैसा लिएको खुलासा भएको छ ।
वाम बुद्धिजीवी नरेन्द्रजंग पिटरले आफ्नो प्रकाशोन्मुख पुस्तकमा यसबारे चर्चा गरेका छन् ।
‘नेकपा (मसाल) बाट विद्रोह गर्न र विद्रोही मसाल सञ्चालन गर्न दिनानाथ शर्मालाइ माओवादीले पैसा दिएको थियो’ पिटरले आफ्नो फेसबुक पेजमा लेखेका छन्, ‘उनी थोरै दिनको लागि मात्र सेती महाकाली इन्चार्ज बने पनि जनयुद्दमै भने फिल्डमै सामेल भएनन् । खरीपाटी विवादमा पनि उनले पक्षधारिता निर्णायक समयमा बिक्रि गरेका थिए ।’
दिनानाथ शर्माले समानान्तर पार्टी सञ्चालन गरेको प्रमाण फेला परेपछि उनलाई नेकपा (मसाल) ले २०५५ चैत २४ गते पार्टीबाट अनिश्चितकालका लागि निष्कासन गरेको थियो । त्यसको केही समय अघि नै उनलाई पार्टीले प्रवक्ताबाट हटाएको थियो ।
शर्माले गोप्य भेला गरी समानान्तर पार्टी निर्माण गरेको र तत्कालिन अवस्थामा आउँदै गरेको चुनाव बहिष्कार गर्न आह्वान गरेका थिए । त्यस सम्बन्धी समाचार रेडियो नेपालको ‘परिवेश कार्यक्रम’ (२०५५ चैत १७) गते प्रशारित भएको थियो । तर, शर्माले समाचार झुठो भएको भन्दै आफू नेकपा (मसाल) को जिम्मेवार व्यक्ति रहेको अन्तिमसम्म दाबी गरेका थिए ।
‘हतियार र सेना बिनाको पार्टी कम्युनिष्ट पार्टी’ हुँदैन’ भन्ने शर्माले त्यसपछि भने नेकपा (मसाल) का कार्यकर्ताहरुलाई पार्टीबाट विद्रोह गर्न खुला रुपमा नै आह्वान गरेका थिए ।
नेकपा (मसाल) ले कारबाही गरेपछि तत्कालिन नेकपा (माओवादी) प्रवेश गरेका शर्मा हाल माओवादी र एमाले एकीकृत भइ बनेको नेकपाको तर्फबाट राष्ट्रिय सभामा संसदीय दलको नेता छन् ।
