काठमाडौँ । सत्तारूढ नेपाल कम्युनिस्ट पार्टी (नेकपा) को सचिवालय बैठकमा प्रधानमन्त्री ओलीसहित ४ जना अनुपस्थित भएका छन् । पार्टीका कार्यकारी अध्यक्ष पुष्पकमल दाहाल प्रचण्डले बोलाएको अनौपचारिक बैठकमा बहुमत नेताहरू सहभागी छन् ।
पार्टी अध्यक्षसमेत रहेका प्रधानमन्त्री केपी शर्मा ओलीले सचिवालयका सदस्यहरूलाई बैठकमा नजान दिएको निर्देशन तीन नेताले पालना गरेका छन् । ९ सदस्यीय सचिवालयमा प्रधानमन्त्री ओलीसहित महासचिव विष्णु पौडेल, सचिवालय सदस्यहरु ईश्वर पोखरेल र रामबहादुर थापा सहभागी छैनन् ।
बैठकमा नगएका एक सचिवालय सदस्यका अनुसार प्रधानमन्त्रीले बैठकमा नजान निर्देशन दिएका थिए । मन्त्री बनेर प्रधानमन्त्री विरुद्धको बैठकमा जानु नैतिकताले नदिने ती नेताले बताए ।
प्रचण्डको अध्यक्षतामा सुरु बैठकमा वरिष्ठ नेताद्वय झलनाथ खनाल, माधव कुमार नेपाल, उपाध्यक्ष बामदेव गौतम र प्रवक्ता नारायणकाजी श्रेष्ठ प्रकाश सहभागी छन् ।
पार्टी अध्यक्षसमेत रहेका प्रधानमन्त्री केपी शर्मा ओलीले बैठक बोलाउन नमानेपछि कार्यकारी अधिकार प्रयोग गरेर प्रचण्डले सचिवालय बैठक बोलाएका हुन् ।
प्रधानमन्त्री ओलीले आफूले बैठक पनि नबोलाउने र बैठकले गरेका निर्णय पनि कार्यान्वयन नगर्ने बताउँदै आएका छन् ।
