काठमाडौँ । नेपाल भ्रमणमा आएका भारतीय सेनाध्यक्ष मनोज मुकुन्द नरवाणेलाई कालो झण्डा देखाउने तयारी गरिरहेका विप्लव नेतृत्वको नेकपाका दुई कार्यकर्ता पक्राउ परेका छन् । पक्राउ पर्नेमा खोटाङका खेम प्रधान र बर्दियाका टिकाराम चौधरी रहेको प्रहरीले जनाएको छ ।
उनीहरूलाई बिहीबार काठमाडौँको बागबजारबाट पक्राउ गरिएको हो । भारतीय सेनाध्यक्षको भ्रमणका क्रममा हुन सक्ने विरोध प्रदर्शनलाई लक्षित गर्दै प्रहरीले गरेको सर्च अप्रेसनमा उनीहरूलाई पक्राउ गरिएको काठमाडौँ प्रहरी परिसरले जनाएको छ ।
सशस्त्र प्रहरीले पक्राउ गरी उनीहरुलाई नेपाल प्रहरीको जिम्मा लगाएको हो । यसअघि प्रहरीले बुधबार पनि विप्लवका कार्यकर्ता बाबुराम तामाङ र भावना विद्रोहीलाई पक्राउ गरेको थियो।
प्रधान सेनापति थापा र भारतीय सेनाध्यक्ष नरवाणेबिच भेटवार्ता
तीन दिने नेपाल भ्रमणमा रहेका भारतीय सेनाध्यक्ष मनोज मुकुन्द नरवाणेले नेपाली सेनाका प्रधान सेनापति पूर्णचन्द्र थापासँग भेट गरेका छन् ।
बिहीबार विहान नेपाली सेनाको जङ्गी अड्डा पुगेका नरवाणे र प्रधान सेनापति थापाबिच दुई देशका सेनाबिीको सम्बन्ध तथा द्विपक्षीय रक्षा सहकार्य विस्तार गर्ने बारे छलफल भएको थियो । सो क्रममा नेपाली सेनाका वरिष्ठ अधिकारीहरुले भारतीय सेना प्रमुख नरवणे समक्ष ब्रिफिङ पनि गरेका काठमाडौंस्थित भारतीय दूतावासले जनाएको छ ।
भारत सरकारको तर्फबाट जनरल नरवाणेले नेपाली सेनाका दुई फिल्ड अस्पताललाई एक्सरे मेसिन, कम्प्युटेड रेडियोग्राफी सिस्टम, आइसियु भेन्टिलेटर, भिडियो इन्डोस्कोपी युनिट, एनेस्थेसिया मेसिन, ल्याब उपकरण, एम्बुलेन्सलगायतका स्वास्थ्य सामाग्रीहरू प्रदान गरेका छन् । नरावणेले काठमाडौँको टुडिखेलस्थित सैनिक मञ्चमा रहेको वीर स्मारकमा (सहिद स्मारक) माल्यार्पण गरी सहिदहरूप्रति श्रद्धाञ्जली अर्पण गरेका थिए ।
