काठमाडौँ । प्रधानमन्त्री केपी शर्मा ओलीले सरकार बदलिन्छ कि भनेर दुविधामा नपर्न आग्रह गर्नुभएको छ । उहाँले आफूले राजीनामा नदिने पनि स्पष्ट पार्नुभएको छ ।
बुधबार चिकित्साशास्त्र अध्ययन संस्थानअन्तर्गतको मनमोहन सेन्टर एनेक्स भवनको उद्घाटन समारोहलाई सम्बोधन गर्दै प्रधानमन्त्री ओलीले कुनै पनि परिस्थितिमा आफूले राजीनामा नदिने बताउनुभएको हो ।
पार्टीभित्रैबाट आफ्नो राजीनामा माग भइरहेको सन्दर्भमा प्रधानमन्त्री ओलीले एक थरि व्यक्तिहरू देशमा अस्थिरता निम्त्याउन लागिपरेको आरोप लगाउनुभयो ।
पार्टीका अर्का अध्यक्ष पुष्पकमल दाहालप्रति लक्षित गर्दै प्रधानमन्त्री ओलीले भन्नुभयो– ‘एक थरि अस्थिरताको खेती गरिरहने देशलाई अस्थिरतातर्फ धकेल्न खोज्ने प्रयासहरू गर्ने आदत छ केहीको । एडिक्ट भएका छन कोही ।’
प्रधानमन्त्री ओलीले आफ्नो रहरले भन्दा पनि जनताको आवश्यकता र समर्थनले प्रधानमन्त्री बनेकोसमेत बताउनुभयो । कुनै पनि जालझेल तथा तिकडमबाट नभई व्यापक जनसमर्थनबाट प्रधानमन्त्री बनेकाले सरकार फेरिन्छ कि भन्ने दुविधामा नपर्नसमेत आग्रह गर्नुभयो । उहाँले भन्नुभयो– ‘म यस ठाउँमा आएको मेरा रहरले होइन, जनताको आवश्यकता र समर्थनले हो । यहाँ पुर्याएको म जालझेल तिकडमबाट होइन । यहाँ पुगेको व्यापक जनसमर्थनबाट हो । त्यसकारण तपाईंहरू ढुक्क भएर काममा लाग्नुस् । यो सरकार फेरिन्छ कि ? बदलिन्छ कि ? धेरैले धेरैपल्ट धेरै प्रकारका कोसिसहरू गरे । भित्रबाहिर अनेक थरिका कोसिसहरू आए । जेमा पनि आलोचना गर्ने, जेमा पनि आलोचना गर्ने । त्यस प्रकारका प्रवृत्तिहरू छन् । त्यसबाट प्रभावित नहोऔँ ।’
प्रधानमन्त्री ओलीले देशका लागि भए पनि राजीनामा नदिने स्पष्ट पार्नुभएको हो । आफूले राजीनामा दिनु भनेको देशलाई बर्बादीतिर धकेल्नु रहेको उहाँको भनाइ थियो ।
‘तपार्इंहरू विचार गर्नुस् के अहिले मैले राजीनामा दिन हुन्छ ? राजीनामा दिन मिल्छ ? मेरा लागि होइन, देशका लागि मैले राजीनामा दिनु भनेको देशलाई बर्बादितिर जान दिनु हो’ उहाँले भन्नुभयो– ‘‘त्यसकारण म राजीनामा दिनेवाला छैन ।’
