प्युठान । प्युठानको गौमुखी गाउँपालिका वडा न. ७ नारिकोटको अखिल नेपाल युवक संघको वड स्तरीय प्रशिक्षण तथा भेला सम्पन्न भएको छ ।
कार्यक्रममा प्रशिक्षणात्मक मन्त्ब्य राख्दै अखिल (छैठौं) का केन्द्रीय सचिव सुवाश जि.सि.ले नारिकोट गाउँ नेपालको कम्युनिस्ट पार्टीहरुको लागि ऎतिहासिक गाउँ रहेको उल्लेख गर्दै नारिकोटलाई बिर्सेर नेपालको कम्युनिस्ट आन्दोलनको ईतिहास पूरा नहुने बताउनुभयो।
उहाँले भन्नुभयो, ‘नारिकोटको इतिहास वर्ग संघर्षको इतिहास हो । त्यो इतिहास नेकपा (मसाल)का महामन्त्री मोहनविक्रम सिंह र खगुलाल गुरुङ लगाएतका नेताहरुले निर्माण गर्नुभएको हो । यदि कसैले यो विचार र त्यो इतिहास विरुद्ध बोल्छ भने त्यो नारिकोट विरुद्धको विचार हो । त्यसप्रकारका विचारहरु २०११ सालमा नारिकोटमै पराजित भएका हुन् । अबका युवाहरूले नारिकोटको इतिहासलाई स्मरण गर्नुपर्दछ र त्यो बाटोमा हिँड्नुपर्दछ ।’
अर्को प्रसंगमा बोल्दै जि.सि. ले नेकपाको सरकारले जनताका अपेक्षाहरुको संबोधन गर्नुको साटो चरम प्रकारले शत्ताको खिचातानी, भागवण्डा र भ्रष्टाचारमा लिप्त भएको कुरा उल्लेख गर्नुभयो । यो स्थितिमा नेपाली कांग्रेस मौन भएर बस्नु झनै लज्जास्पद भएको बताउनुभयो । उहाँले राष्ट्रिय जनमोर्चाले मात्रै सहि राजनैतिक विचार र दर्शन बोकि देश र जनताको पक्षमा निरन्तर आवाज बोल्दै आएको कुरा स्पष्ट गर्नुभयो ।
कार्यक्रममा राष्ट्रिय जनमोर्चाका वडा न. ७ का अध्यक्ष चन्द्रबहादुर के.एम., अखिल नेपाल महिला संघकी जिल्ला अध्यक्ष मधु जि.सि., वडा न. ७ का निर्वाचित वडा सदस्य ज्ञानबहादुर कुँवर, युवक संघका पूर्व जिल्ला सदस्य कुलबहादुर कुँवर, मूल प्रवाह एकता समाजका वेगम कुँवर, देउराली कृषि सहकारीका संचालक विदुर पुरी, अखिल नेपाल युवक संघका वडा अध्यक्ष खिमानसिंह जि.एम., जातीय समता समाजका गाउँपालिका सचिव सिताराम सुनार र सदस्य लोकबहादुर सुनार लगाएतका नेताहरुको उपस्थिति रहेको थियो ।
प्रशिक्षण कार्यक्रमको सञ्चालन युवक संघ गौमुखी गाउँपालिका अध्यक्ष विरबहादुर के.सी., अध्यक्षता युवक संघका वडा उपाध्यक्ष वसन्त के.सी. र स्वागत मन्त्ब्य राष्ट्रिय जनमोर्चाका वडा उपाध्यक्ष हुकुमबहादुर थापाले गर्नुभएको थियो ।
