नयाँ दिल्ली (भारत) । मूलप्रवाह अखिल भारत नेपाली एकता समाजका केन्द्रीय सदस्य कमल प्रसाद गैरेको ह्रदयघातका कारण निधन भएको छ । ६० वर्षीय गैरेको शुक्रबार (२७ सितम्बर) राति १० बजे निधन भएको मूलप्रवाहले जनाएको छ ।
अर्घाखाँचीको भुमिकास्थान नगरपालिका वडा नं ८ घर भई भारतको कानपुरमा कार्यरत गैरे नोकरीबाट अवकाशपछि पनि संगठनमा इमान्दारिताका साथ सक्रिय हुनुहुन्थ्यो ।
सन् १९८१ देखि मूलप्रवाहमा आवद्ध गैरे पाचौँ, छैटौं र सातौँ अखिल भारत सम्मेलनबाट केन्द्रीय सदस्यमा निर्वाचित हुनुभएको थियो । उहाँका श्रीमती, दुई छोरी र दुई छोराहरु छन् ।
नेता गैरेको निधनले मूलप्रवाह अखिल भारत नेपाली एकता समाजमा अपुरणीय क्षति पुगेको समाजका अध्यक्ष दुर्गा केसीले वक्तव्यमार्फत जनाउनुभएको छ ।
यस्तै, बहराइन नेपाली एकता समाजले पनि गैरेप्रति श्रद्धाञ्जली व्यक्त गरेको छ । समाजका अध्यक्ष धनबहादुर कार्कीद्वारा हस्ताक्षरित वक्तव्यमा शोक सन्तप्त परिवारजनमा समवेदना प्रकट गरिएको छ ।
