बुटवल । प्रदेश ५ को राजधानी सार्ने विषयले तनाव बढ्दै जाँदा आइतबार साँझ बुटवलमा प्रहरीले हवाई फायर गरेको छ । प्रदेश ५ का मुख्यमन्त्री शंकर पोखरेल सवार गाडीलाई लक्षित गरी आन्दोलनकारीले ढुंगामुडा गरेपछि प्रहरीले हवाई फायर गरेको हो ।
काठमाडौंबाट गौतमबुद्ध विमानस्थलमा ओर्लिएर बुटवल जाँदै गरेका मुख्यमन्त्री पोखरेलको गाडीमाथि मिलनचोक नजिक प्रदर्शनकारीले ढुंगा हानेका थिए । त्यस क्रममा मुख्यमन्त्रीको गाडीसहित स्कटिङमा रहेको प्रहरीको गाडीमा समेत क्षति पुगेको छ ।
मुख्यमन्त्रीको गाडी तोडफोड भएपछि प्रहरीले केही राउण्ड हवाई फायर गरेको हो । प्रहरीले ढुंगा प्रहार गर्ने ९ जनालाई पक्राउ गरेको छ। पक्राउ पर्नेमा अधिकांश कांग्रेसका स्थानीय नेता छन् ।
प्रदेश सरकारले स्थायी राजधानी दाङको देउखुरी क्षेत्रमा बनाउन प्रदेश सभामा सरकारको तर्फबाट प्रस्ताव पेस गरेपछि बुटवलमा आन्दोलन चर्कँदै गएको हो । स्थायी राजधानी तोक्ने विषयमा सोमबार प्रदेश सभामा मतदान हुँदैछ ।
