शंकर प्रसाद पोख्रेल, गुल्मी ।
गुल्मी जिल्लाकोन रेसुंगा नगरपालिका–१० सिमिचौरमा रेसुंगा विमानस्थलको काम धमाधम भइरहेको छ । विमानस्थलमा कार्यरत इन्जिनियर दिनेश परियारका अनुसार अहिलेसम्म जग्गा अधिग्रहण, कटिङ, फिलिङ, ग्याबिङ, पर्खाल र नाली निर्माणको काम सकिएको छ । करिब ५० प्रतिशत काम सकिँदा २१ करोड रुपैयाँ खर्च भएको इन्जिनियर परियारले जानकारी दिनुभयो ।
विमानस्थल निर्माणको काम २०६३ साल बाट सुरु भएको थियो । विगतमा विमानस्थल निर्माणको कामले उल्लेखनीय रुपमा गति लिन नसके पनि पछिल्लो समय परराष्ट्र मन्त्री प्रदीप ज्ञवालीले विमानस्थल निर्माणको काममा सकृयता देखाएको कारणले निर्माणको कामले गति लिएको वडा अध्यक्ष पदम अर्यालले बताउनुभयो ।
कोरोना संक्रमणकाबीच पनि गुल्मीमा निर्माणाधीन रेसुंगा विमानस्थलको निर्माण कार्य अगाडि बढेको दृश्यहरु देख्न सकिन्छ । विमानस्थलको निर्माणपछि रोजगारी बढ्ने र यात्रा सहज हुने स्थानीयको विश्वास छ ।
स्थानीय नरेन्द्र अर्यालले युगदर्शनसँग भन्नुभयो, ‘यो विमानस्थल निर्माण भएपछि स्थानीयलाई केही मात्र भएपनी रोजगार र यो ठाउँको विकास हुनेमा आशावादी छु।’
यस्तै, अर्का स्थानीय घन बहादुर पुनले भने विमानस्थल निर्माण सुरु भएको धेरै वर्ष भएपनी समयमै काम नसकिएको गुनासो गर्नुभयो ।
यो स्थानबाट गुल्मीको चर्चित पर्यटीय स्थल रेसुंगाको डांडा र अर्जुन डाँडाका मनमोहक दृश्य देख्न सकिन्छ । विमानस्थल सम्पन्न भए गुल्मी अर्घाखाँची प्युठान, बागलुङका जनतालाई यात्रा गर्न सहज हुने देखिन्छ ।
