शंकर प्रसाद पोख्रेल, गुल्मी ।
तरकारीमा विचौलिया घुस्नु किसानका लागि सबैभन्दा ठुलो समस्या हो । विचौलियाका कारण किसानले आफ्नो उत्पादन सस्तोमा बेच्न बाध्य त छन् नै, उपभोक्ताले चर्को मूल्य तिर्नुपर्ने बाध्यता छ ।

तर, गुल्मीको रेसुङ्गा नगरपालिका वडा नं ९ का किसान झगबहादुर विकले आफ्नो उत्पादनमा विचौलियालाई बन्देज गर्नुभएको छ । आफ्नो मेहेनतको मूल्य पाउन र उपभोक्तालाई सुपथ मूल्यमा तरकारी बिक्री गर्न उहाँले आफैँ तरकारी पसल सञ्चालन गर्नुभएको छ ।

तरकारी खरिदमा विचौलिया घुसेको भन्दै विकले आफूले उत्पादन गरेको तरकारी र फलफूल आफैँ बेच्न आफ्नै पसल खोल्नुभएको हो ।

झग बहादुरको घर रेसुङ्गा नगरपालिका–११ डांडाखर्क तल्लाचौरमा पर्छ । झगबहादुर निकै मेहनती कृषक भएको उहाँका छिमेकी थम्मन कुँवरले बताउनु भयो ।

तपाईंले आफैँ उत्पादन गरेर उपभोक्तालाई तरकारी तथा फलफूल बेच्ने सोच कसरी बनाउनुभयो ? भन्ने युगदर्शनको प्रश्नमा उहाँले विचौलियालाई आफूले सस्तो मुल्यमा दिने गरेको र बजारमा लगेर उपभोक्तालाई महंगोमा बेच्ने गरेको तर आफूलाई समयमै पैसा पनि नमिल्ने भएकोले त्यसबाट छुटकारा पाउन चाहेका बताउनुभयो ।

आफैँ उत्पादन गरेर सिधा उपभोक्तालाई बेच्ने योजना अनुसार बजारमा नयाँ तरकारी पसल खोलेको झगबहादुरले बताउनुभयो ।

उहाँले तिते करेला, अमिला, घिराम्ला, काँक्रो, कागती, गिठा, पिँडालु, भान्टा, अदुवा, मेवा, अकबरे खुर्सानी, लाम्चे खुर्सानी, फर्सी, फर्सिका मुन्टा, जिरे खुर्सानी, केरा, सोस्ता, सिमि, मरौटी, काँडे धनिया, लौका, ठुलो करेला, कटर प्याज, आलु, टमाटर, लसुनलगायतका कृषि उपज उत्पादन गर्ने गर्नुभएको छ ।

उहाँले ब्यावसायिक रूपमा तरकारी खेती गर्न लागेको पाँच वर्ष भएको छ । तरकारी बेचेर नै आफूले दुई भाइ छोराहरु पढाएको र घर व्यबहार चलाएको झगबहादुरले बताउनुभयो ।

‘गरे आफ्नै देशमा सुन फलाउन सकिन्छ’ भन्दै उहाँले कोरोनाको कारण स्वदेश फर्किएका युवाहरूलाई आधुनिक कृषि पेसा अँगाल्न सुझाव दिनुभएको छ । यस्तै सरकारलाई कृषकहरुको लागि राहत प्याकेज र बेरोजगार युवाहरुलाइ कृषि मैत्री रोजगार वातावरण मिलाउन पनि उहाँको आग्रह छ ।