काठमाडौं । अख्तियार दुरुपयोग अनुसन्धान आयोगले संघीय आयोजना कार्यान्वयन इकाई, बिराटनगरका तत्कालीन सिनियर डिभिजनल इन्जिनियर काशी प्रसाद गुप्तासमेत १३ जनाविरुद्ध भ्रष्टाचार मुद्दा दायर गरेको छ ।
अख्तियारले सीडीई गुप्ताले अवैध रुपमा १६ करोड ७२ लाख ५६ हजार ४९६रुपैयाँ ८६ पैसा आर्जन गरेको र आफ्ना १२ जना आफन्तमार्फत लुकाएको आरोपमा अख्तियारले विशेष अदालतमा भ्रष्टाचार मुद्दा दायर गरेको हो ।
सीडीई काशी प्रसाद गुप्ताले मिति २०३८।०९।१२ मा ओभरसियर पदबाट सार्वजनिक सेवामा प्रवेश गरी मिति २०७६।०३।०५ मा सीडीई पदबाट अवकाश भएको अवधिसम्म सो रकम गैरकानुनी रुपमा आर्जन गरेको अख्तियारको ठहर छ ।
गुप्ताले पदीय हैसियतको दुरूपयोग गरी गैरकानूनी रूपमा सम्पत्ति आर्जन गरेको जान्दाजान्दै त्यस्तो सम्पत्ति लुकाउने छिपाउने तथा दुरूपयोग गर्ने एवं भोग चलन गर्ने उद्देश्यले त्यस्तो सम्पत्तिलाई अवैध रूपमा लुकाउन छिपाउन सहयोग गरेको आरोपमा उनीसहित १२ जना आफन्तविरुद्ध मुद्दा चलाइएको छ ।
गुप्ताले आफन्तहरु अन्जु कुमारी महतो, उदित नारायण प्रसाद रौनियार, चन्देश्वर महतो, धिरज कुमार गुप्ता, प्रिति कुमारी गुप्ता, डा. रचना प्रसाद शाह, विकास प्रसाद गुप्ता, विनय कुमार सिंह, विभा रानी, संगिता साह रौनियार र सन्तोष कुमार गुप्ताको नाममा खाता खोली १० करोड ४४ लाख ४३ हजार ७८३ रुपैयाँ ९८ पैसा लुकाई छिपाई राखेको अख्तियारको ठहर छ।
