नयाँ दिल्ली । भारतको हरियाणा राज्यस्थित भिवानीमा लिफ्ट दुर्घटनामा परी नेपाली श्रमिक प्रकाश केसीको दुःखद निधन भएको छ ।
मूल प्रवाह अखिल भारत नेपाली एकता समाज पश्चिमोत्तर क्षेत्रीय समिति सांस्कृतिक विभागका सदस्य तथा भिवानी नगर समितिका सदस्य प्रकाश केसीको कार्यस्थलमा काम गर्ने क्रममा लिफ्टको केबल (रस्सी) चुडिएर लिफ्ट खस्दा मृत्यु भएको हो।
मल्लरानी गाउँपालिका–३, प्युठान घर भई हाल भारतको हरियाणास्थित भिवानीमा बस्दै आएका केसी अनाज मण्डी नजिकैको एमआरएफ टायर सोरुममा टायरको अलाइनमेन्ट तथा टायर परिवर्तन गर्ने काम गर्दै आएका थिए। नोभेम्बर ३, २०२६ का दिन साँझ करिब ६ः१५ बजे ड्युटीमै रहेका बेला उक्त दुर्घटना भएको शोक वक्तव्यमा उल्लेख छ ।
केसीका श्रीमती, १४ वर्षीया छोरी र १२ वर्षीय छोरा रहेका छन् । उनको असामयिक निधनप्रति मूल प्रवाह अखिल भारत नेपाली एकता समाज भिवानी नगर समितिले गहिरो दुःख व्यक्त गर्दै दिवंगतप्रति भावपूर्ण श्रद्धाञ्जली अर्पण गरेको छ । साथै शोकसन्तप्त परिवार तथा आफन्तजनप्रति हार्दिक समवेदना प्रकट गरेको छ।
भिवानी नगर समितिका अध्यक्ष दिलबहादुर भट्टराईद्वारा जारी शोक वक्तव्यमा केसीको निधनले संगठनलाई अपूरणीय क्षति पुगेको उल्लेख गरिएको छ ।
