नयाँ दिल्ली । मूल प्रवाह अखिल भारत नेपाली एकता समाज दिल्ली नगर समितिले आगामी दीपावली तथा तिहार पर्वको अवसरमा देउसी–भैलो कार्यक्रम आयोजना गर्ने सर्वसम्मत निर्णय गरेको छ ।
२०८३ कार्तिक १६ गते (१ नोभेम्बर २०२६) दिल्ली नगर समितिको आयोजनामा नगर समिति तथा महिला विभागका सदस्यहरूको उपस्थितिमा सम्पन्न छलफलले उक्त निर्णय गरेको हो।
बैठकको निर्णयअनुसार कलाकार तथा समितिका सदस्यहरू सम्मिलित एक विशेष टोली गठन गरी दिल्लीका विभिन्न स्थानमा बसोबास गर्ने नेपाली दाजुभाइ तथा दिदीबहिनीहरूको घरघरमा पुगेर देउसी–भैलो खेल्ने कार्यक्रम तय गरिएको छ ।
प्रवासमा रहेर पनि नेपाली मौलिक कला, संस्कृति र परम्पराको संरक्षण तथा प्रवद्र्धन गर्ने उद्देश्यले कार्यक्रम आयोजना गर्न लागिएको समितिले जनाएको छ । साथै, यस कार्यक्रमले प्रवासमा रहेका नेपालीहरूबीच आपसी सद्भाव, एकता, भाइचारा र आत्मीय सम्बन्धलाई थप सुदृढ बनाउने अपेक्षा गरिएको छ ।
कार्यक्रमलाई सफल र भव्य रूपमा सम्पन्न गर्न नगर समितिले केन्द्रीय तथा नगर समितिका सम्पूर्ण पदाधिकारी, सदस्यहरू र शुभेच्छुक नेपाली दाजुभाइ तथा दिदीबहिनीहरूलाई सक्रिय सहभागिता, सहयोग र सहकार्यका लागि हार्दिक अनुरोध गरेको छ ।
समितिले उल्लेखित सदस्यहरूका साथै अन्य सम्पूर्ण सदस्यहरूलाई समेत कार्यक्रममा उपस्थित भई सक्रिय भूमिका निर्वाह गर्न आग्रह गरेको छ ।
