काठमाडौँ । राष्ट्रिय स्वतन्त्र पार्टी (रास्वपा) ले प्रधान न्यायाधीश डा. मनोज शर्मालाई महाभियोग लगाउने विषयमा पर्याप्त प्रमाण सार्वजनिक नभएको भन्दै विवादमा तानिएका अन्य न्यायाधीशमाथि मात्र कारबाही प्रक्रिया अघि बढाउन संसदीय दललाई निर्देशन दिएको छ।
शनिबार वनस्थलीस्थित पार्टी केन्द्रीय कार्यालयमा बसेको सचिवालय बैठकले न्यायाधीशहरूको बिचौलिया इनम सापकोटासँगको भनिएको सम्बन्धबारे छलफल गर्दै न्यायालयभित्रका विकृति र अनुचित साँठगाँठलाई विधिसम्मत रूपमा निरूपण गर्न संसद्बाट निर्णायक कदम चाल्नुपर्ने निष्कर्ष निकालेको हो।
पार्टी सभापति रवि लामिछानेले प्रधान न्यायाधीशविरुद्ध पर्याप्त प्रमाण नआएकाले हतारमा कारबाही प्रक्रिया अघि बढाउन नहुने धारणा राखेको स्रोतको भनाइ छ। तर, प्रधानमन्त्री एवं संसदीय दलका नेता बालेन्द्र शाह भने विवादमा तानिएका प्रधान न्यायाधीशसहित सबै न्यायाधीशलाई महाभियोग लगाउने पक्षमा रहेको स्रोतले जनाएको छ।
यसैबीच, रास्वपाले सञ्चारगृहमा प्रहरी प्रशासनमार्फत पत्रकारमाथि भएको भनिएको धरपकडप्रति गम्भीर आपत्ति जनाउँदै घटनाको छानबिन गरी गैरजिम्मेवार आदेश दिने व्यक्तिमाथि कारबाही गर्न सरकारलाई निर्देशन दिएको छ।
पार्टीले संविधान, लोकतन्त्र, नागरिक अधिकार तथा प्रेस स्वतन्त्रतामाथि कुनै सम्झौता नगर्ने स्पष्ट पार्दै न्यायालयको निष्पक्षता र जवाफदेहिता कायम गर्नुपर्नेमा जोड दिएको छ।
