ग्वालियर (भारत) । भारतको मध्य प्रदेशस्थित ग्वालियरमा शीतला माता मन्दिरनजिकै धान बोकेको अनियन्त्रित ट्रकले तीर्थयात्रीलाई ठक्कर दिँदा कम्तीमा १२ जनाको मृत्यु भएको छ भने अन्य २७ जना घाइते भएका छन् । घाइतेमध्ये पाँचदेखि छ जनाको अवस्था गम्भीर रहेको बताइएको छ ।
वरिष्ठ प्रहरी अधीक्षक धर्मवीर सिंहका अनुसार आइतबार बिहान करिब १:३० बजे चिनोरबाट मन्दिरतर्फ आउँदै गरेको ट्रकले ठाडो ओरालोमा नियन्त्रण गुमाएको थियो । ट्रकले प्रहरीका अवरोध तोड्दै तीर्थयात्रीहरूलाई ठक्कर दिएपछि मन्दिरको बाहिरी पर्खाल र ढोकामा समेत ठोक्किएको थियो । उक्त सडकमा भारी सवारीसाधन चलाउन प्रतिबन्ध लगाइएको थियो ।
दुर्घटनापछि ३९ जनालाई अस्पताल पुर्याइएको र तीमध्ये १२ जनाको मृत्यु भएको सिंहले जानकारी दिए । घटनामा ड्युटीमा रहेका दुई प्रहरी कर्मचारीसमेत घाइते भएका छन् ।
ग्वालियरकी जिल्ला अधिकारी रुचिका चौहानले उद्धारका लागि तत्काल एम्बुलेन्स र अन्य सवारीसाधन पठाइएको बताइन् ।
दुर्घटनाको कारण पत्ता लगाउन ट्रकको प्राविधिक परीक्षण गरिने बनाउँदै उनले नवरात्रका बेला राखिएका प्रहरी अवरोध तथा जाँच चौकी पार गरेर ट्रक कसरी सडकमा प्रवेश गर्यो भन्ने विषयमा अनुसन्धान भइरहेको जानकारी दिइन् ।
एक प्रत्यक्षदर्शीले ट्रकमा क्षमताभन्दा बढी भार रहेको दाबी गर्दै त्यसले पसल र मानिसलाई ठक्कर दिएको बताए । उनका भाइसमेत दुर्घटनामा घाइते भएका छन् । (रासस/एएनआई)
