काठमाडौँ । सभामुख डोलप्रसाद अर्यालसँग नेपालका लागि भारतीय राजदूत नवीन श्रीवास्तवले सोमबार सिंहदरबारस्थित सङ्घीय संसद् सचिवालयमा बिदाइ भेट गरेका छन् ।
भेटमा सभामुख अर्यालले सफल कार्यकाल सम्पन्न गरेकोमा राजदूत श्रीवास्तवलाई बधाई तथा शुभकामना दिँदै नेपाल–भारत द्विपक्षीय सम्बन्ध र सहकार्य सुदृढ बनाउन पुर्याएको योगदानको प्रशंसा गरे ।
उनले पछिल्लो विपद्का क्रममा भारतले उद्धार तथा राहत सामग्री, विशेषज्ञ टोली र प्राविधिक सहयोग उपलब्ध गराएकोमा आभार व्यक्त गरे । साथै, नेपाल–भारत संसदीय मैत्री समूह र अन्तर–संसदीय सहकार्यलाई थप प्रभावकारी बनाउने विषयमा छलफल भएको सभामुखको सचिवालयले जनाएको छ ।
भेटमा राजदूत श्रीवास्तवले रसुवामा भएको क्षति अकल्पनीय रहेको उल्लेख गर्दै भारतले राहत तथा उद्धारमा निरन्तर सहयोग गरिरहेको र संकटका बेला सधैँ नेपालको साथमा रहने प्रतिबद्धता व्यक्त गरे ।
