काठमाडौँ । नेकपा (मसाल) ले पार्टीसदस्य फर्सबहादुर सुनारप्रति श्रद्धाञ्जली व्यक्त गरेको छ । २०८३ भदौ २३ गते उहाँको निधन भएपछि शोकमन्तव्य जारी गर्दै मसालले श्रद्धाञ्जली व्यक्त गरेको हो ।
महामन्त्री मोहनविक्रम सिंहको हस्ताक्षरमा भदौ २७ गते शनिबार शोकवक्तव्य जारी गर्दै मसालले मृतक सुनारका परिवारप्रति समवेदना तथा सहानुभूति प्रकट गरेको छ ।
सुनारको निधनबाट मसालको आन्दोलनमा क्षति पुगेको धारणा व्यक्त गरिएको शोकमन्तव्यको पूर्ण पाठ यस्तो छ :
“पाल्पा जिल्ला रैनादेवीछहरा–३ भुवनपोखरी तालपोखरा निवासी कमरेड फर्सबहादुर सुनार (का. राम) को २०८३ भदौ २३ गते मृत्यु भएको छ । हामीले उहाँको मृत्युप्रति गहिरो दु:ख व्यक्त गर्दै सन्तप्त परिवारजनप्रति हार्दिक समवेदना तथा सहानुभूति प्रकट गर्दछौँ ।
कमरेड फर्सबहादुर सुनार हाम्रो पार्टीको इमानदार, कर्तव्यनिष्ठ, अनुशासित र स्वच्छ छवि भएको सदस्य हुनुहुन्थ्यो । उहाँले पाल्पा जिल्लामा हाम्रो पार्टीका विभिन्न जनवर्गीय सङ्गठन र पार्टीका विभिन्न तहमा रहेर राजनीतिक तथा सामाजिक जिम्मेवारी सम्हाल्नुभएको थियो । उहाँको मृत्युबाट हाम्रो पार्टीको आन्दोलनमा गम्भीर क्षति पुगेको छ ।
अन्तमा हामीले कामरेड फर्सबहादुर सुनारप्रति हार्दिक श्रद्धाञ्जली व्यक्त गर्दछौँ ।”
