काठमाडौँ । राष्ट्रिय जनमोर्चाले बाराकी तीन वर्षीया अबोध बालिका गरिमा चौधरीको बलात्कारपछि हत्याका अपराधीलाई हदैसम्मको कानुनी कारबाही गर्न माग गरेको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८३ भदौ ६ गते शनिबार प्रेसवक्तव्य जारी गर्दै राजमोले सो माग गरेको हो ।
गरिमा हराएको सूचना परिवारले समयमै दिएको भए पनि प्रहरीले तदारुकता नदेखाएको आरोप लगाउँदै राजमोले वक्तव्यमा लापर्बाह तथा गैरजिम्मेवार प्रहरीसमेत माथि कारबाहीको माग गरेको छ ।
गरिमालाई न्याय दिलाउन देशव्यापी रूपमा उठिरहेको आवाज र आन्दोलनप्रति ऐक्यबद्धता प्रकट गर्दै राजमोले उनीप्रति श्रद्धाञ्जली र शोकसन्तप्त परिवारप्रति समवेदना व्यक्त गरेको छ ।
प्रेसवक्तव्यको पूर्ण पाठ यस्तो छ :
“बाराकी ३ वर्षे अबोध बालिका गरिमा चौधरीको बलात्कार र हत्याकाण्डको हाम्रो दल राष्ट्रिय जनमोर्चाले घोर विरोध तथा भत्र्सना गर्दछ । उक्त काण्डमा संलग्न अपराधीलाई तुरुन्तै गिरफ्तार गरी हदैसम्मको सजाय गरिनुपर्दछ ।
गरिमाका बाआमाले उनी हराएको सूचना समयमा नै प्रहरीलाई दिएका थिए । निजको खोजतलासमा प्रहरीले तुरुन्तै तदारुकता देखाएको भए सम्भवत: यस्तो हृदयविदारक घटना घट्नबाट रोक्न सकिन्थ्यो तर प्रहरीको लापर्बाही र गैरजिम्मेवार रवैयाका कारण गरिमामाथि बलात्कार भयो । बलात्कार मात्र भएन, अपराधीले उनको दुवै आँखा झिकेर, जिब्रो काटेर विभत्स तरिकाबाट हत्यासमेत गरे । गरिमाको खोजतलासमा लापर्बाही र गैरजिम्मेवारी रवैया अपनाउने प्रहरी अधिकारीमाथि समेत कडा कारबाही गरिनुपर्दछ ।
विभिन्न क्षेत्रबाट गरिमाको न्यायका पक्षमा देशव्यापी रूपमा उठिरहेका आवाज र आन्दोलनप्रति हामीले ऐक्यबद्धता प्रकट गर्दछौँ । अन्तमा अबोध बालिका गरिमाप्रति श्रद्धाञ्जली व्यक्त गर्दै सन्तप्त परिवारप्रति समवेदना प्रकट गर्दछौँ ।”