काठमाडौँ । राष्ट्रिय जनमोर्चाले लुम्बिनी प्रदेशमा नेकपा (एमाले) र नेपाली कम्युनिस्ट पार्टीसित सरकार गठनमा सहकार्य गर्ने भएको छ ।
२०८३ साउन २७ गते बुधबार तीन दलको सहमतिपत्रमा हस्ताक्षरसँगै सरकार गठनमा सहकार्य सुनिश्चित भएको हो ।
नेकपा (मसाल) का महामन्त्री मोहनविक्रम सिंह, एमालेका अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ द्वारा हस्ताक्षरित वक्तव्यको पहिलो बुँदामा लुम्बिनी प्रदेशको विकासनिर्माण कार्यमा सहकार्य गर्दै सरकार गठन गर्ने उल्लेख छ ।
त्यस्तै, राष्ट्रिय स्वाधीनता, संविधान र गणतन्त्रको पक्षमा तथा प्रतिगमन विरुद्धको आन्दोलनमा सहकार्य गर्ने अर्को बुँदामा उल्लेख गरिएको छ ।
यस सम्बन्धमा राजमो केन्द्रीय सदस्य तथा लुम्बिनी प्रदेश सांसद तारा थापासित युगदर्शनले सम्पर्क गर्दा आफूहरूले एमाले र नेकपासित सहकार्य गर्न सहमति भएको स्पष्ट पार्नुभयो ।
सांसद थापाले आगामी प्रक्रियागत कार्यहरू प्रदेशबाट अगाडि बढ्ने जानकारी दिनुभयो ।
राजमो केन्द्रीय उपाध्यक्ष तथा प्रवक्ता दुर्गा पौडेलले पनि लुम्बिनी प्रदेशमा एमाले र नेकपासित सहकार्य गर्ने निर्णय भएको पुष्टि गर्नुभयो ।
उहाँले भन्नुभयो– ‘विकासनिर्माणको सवालमा एमाले र नेकपासित सहकार्य गर्ने निर्णय भएको छ तर हामी प्रदेश सरकारमा जाँदैनौँ ।’
८३ सदस्यीय लुम्बिनी प्रदेशसभामा सरकार बनाउन ४२ सांसद आवश्यक पर्छन् । एमाालेसँग २९ र नेकपासँग १३ सांसद छन् । राष्ट्रिय जनमोर्चासँग एक जना सांसद छन् ।
यसअघि नेपाली कङ्ग्रेसले सत्ता छाडेकाले मुख्यमन्त्री चेतनारायण आचार्यले भदौ १ गते विश्वासको मत लिने तयारी गरेका छन् ।
