काठमाडौं। कृत्रिम बुद्धिमत्ता (एआई) र ड्रोन प्रविधिले विश्वभर विकासको नयाँ आयाम सिर्जना गरिरहेका बेला नेपालमा पनि यस क्षेत्रको सम्भावना, नीति र व्यवसायिक अवसरमाथि केन्द्रित अन्तर्राष्ट्रियस्तरको ‘ड्रोन कन्फरेन्स एन्ड एक्जिबिसन’ आयोजना हुने भएको छ।
ड्रोन हब नेपालको मुख्य आयोजनामा तथा एसियन इन्स्टिच्युट अफ आर्टिफिसियल इन्टेलिजेन्स (एआईएआई) र इन–स्पान सेन्टर अफ एक्सिलेन्सको सहकार्यमा आगामी भदौ ९ गते काठमाडौंको दरबारमार्गस्थित होटल याक एन्ड यतीमा सम्मेलन आयोजना गरिने भएको हो।
कार्यक्रममा भारतीय दूतावासको सहयोग रहनेछ भने नेपाल विश्वविद्यालय, लुम्बिनी प्राविधिक विश्वविद्यालय र मधेश विश्वविद्यालय शैक्षिक साझेदारका रूपमा सहभागी हुनेछन्।
‘विकासका लागि ड्रोनः नेपाल र बाहिरका लागि एआई–सञ्चालित समाधानहरू’ भन्ने मूल नारासहित आयोजना हुने सम्मेलनमा नेपाल, भारत तथा युरोपमा ड्रोन प्रविधिको प्रयोग, नवप्रवर्तन र सफल अभ्यासबारे अनुभव आदानप्रदान गरिने आयोजकले जनाएको छ।
सम्मेलनमा ड्रोन प्रविधिको सुरक्षित, प्रभावकारी र व्यावसायिक प्रयोगका लागि आवश्यक नीति, नियमन र कानुनी व्यवस्थामाथि समेत गहन छलफल हुने बताइएको छ। साथै नेपाल र भारतका ड्रोन उद्योगबीच सहकार्य, लगानी तथा बजार विस्तारका सम्भावित अवसरहरूबारे विशेष सत्र सञ्चालन गरिनेछ।
आयोजकका अनुसार कार्यक्रममा ३० भन्दा बढी स्वदेशी तथा विदेशी ड्रोन कम्पनीको सहभागिता रहनेछ भने ५०० भन्दा बढी नीति निर्माता, प्रविधि विज्ञ, अनुसन्धानकर्ता, उद्यमी, विद्यार्थी तथा उद्योग प्रतिनिधि सहभागी हुने अपेक्षा गरिएको छ।
सम्मेलनको अर्को प्रमुख आकर्षण अत्याधुनिक ड्रोन प्रविधिको प्रदर्शनी हुनेछ, जहाँ विभिन्न अन्तर्राष्ट्रिय तथा स्वदेशी कम्पनीहरूले उत्पादन गरेका नवीनतम ड्रोन, एआई–आधारित समाधान तथा अत्याधुनिक प्रविधिको प्रत्यक्ष प्रदर्शन गरिनेछ।
