जुमानसिंह केसी, खलङ्गा ।
नेकपा (मसाल) प्युठानको आयोजनामा जिल्ला सचिवालय सदस्य तथा स्वर्गद्वारी नगरपालिकाका नगर उपप्रमुख मीनराज रानामगर (पार्टीमा टेक नाम अनन्त) को स्मृतिमा श्रद्धाञ्जली सभा सम्पन्न भएको छ ।
२०८३ असार २५ गते बिहीबारका दिन राष्ट्रिय जनमोर्चाका लुम्बिनी प्रदेशका अध्यक्ष बोमबहादुर खत्रीको प्रमुख आतिथ्यमा उक्त कार्यक्रम सम्पन्न भएको हो ।
श्रद्धाञ्जली सभामा शोकमन्तव्य राख्दै राजमो प्रदेश अध्यक्ष खत्रीले मीनराजको मृत्युले समग्र पार्टीलाई क्षति पुगेको बताउनुभयो ।
मीनराजको निधनबाट एउटा कर्मठ, असल र होनहार नेता गुमाएको बताउँदै भन्दै खत्रीले उहाँका सपना र अधुरा कार्य पूरा गर्न आवश्यक रहेको जिकिर गर्नुभयो ।
मीनराजको निधनले पार्टी मात्र होइन, समग्र नगरपालिका नै शोकमा परेको भन्दै शोकलाई शक्तिमा बदल्नुपर्नेमा उहाँले जोड दिनुभयो ।
कार्यक्रममा राजमो केन्द्रीय सदस्य तथा मल्लरानी गाउँपालिकाका अध्यक्ष कृष्ण खड्का, राजमो लुम्बिनी प्रदेश समितिका सल्लाहकार सुरेश थापा, मसालको ५ नम्बर ब्युरो प्रवक्ता तिलक जिसी, राजमो प्युठानका अध्यक्ष ज्ञामुराम न्यौपाने, राजमो दाङका अध्यक्ष गणेश आचार्य, नेपाली कङ्ग्रेस प्युठानका सभापति विष्ण्ॉकुमार गिरी, नेपाली कम्युनिस्ट पार्टीका नेता मेघराज जिसी र क्रान्तिकारी कम्युनिस्ट पार्टीका नेता जितामित्र सुनारले शोकमन्तव्य राख्नुभएको थियो ।
कार्यक्रममा मन्तव्य राख्दै स्वर्गद्वारी नगरपालिकाका नगर प्रमुख टेकप्रसा भण्डारीले उपप्रमुख रानाको सम्झनामा शालिक निर्माण गर्ने, साथै उहाँको नामबाट धनबाङ जाने बाटोको नामकरण गरिने जानकारी गराउनुभएको थियो ।
मसालको प्युठान जिल्ला प्रवक्ता राम पहाडीको अध्यक्षता तथा नगर समितिका सचिव गङ्गाराम विसीको सञ्चालनमा अघि बढेको उक्त कार्यक्रममा राजमो नेता इमानसिंह खड्काले स्वागत मन्तव्य राख्नुभएको थियोे ।
कार्यक्रममा मीनराजको जीवनी र उहाँले गर्नुभएका समग्र कामको बारेमा स्वर्गद्वारी नगरपालिका वडा नं. २ का वडाअध्यक्ष बुधीराम पुनले चर्चा गर्नुभएको थियो ।
सभामा विभिन्न पार्टीका प्रतिनिधि, जनप्रतिनिधि र स्थानीयवासीको उल्लेखनीय सहभागिता रहेको थियो ।
मीनराजले विद्यार्थी राजनीतिबाट अगाडि बढ्ने क्रममा पार्टी र विभिन्न सामाजिक गतिविधिमा सकृय हुँदै विकास निर्माणका कार्य गर्दै आउनुभएको थियोे । त्यस क्रममा उहाँले २०७४ सालमा स्वर्गद्वारी नगरपालिकाको वडा नम्बर २ को वडाअध्यक्षको जिम्मेवारी कुशलतापूर्वक पूरा गर्दै २०७९ सालको स्थानीय निर्वाचनबाट नगर उपप्रमुखमा निर्वाचित हुनुभएको थियो ।
उपप्रमुख मीनराजले दुर्गम बस्ती, गाउँठाउँमा शिक्षा, स्वास्थ्य, खानेपानी, मोटरबाटोलगायतका कार्यमा महत्त्वपूर्ण योगदान पुर्याउनुभएको नगरपालिकाले जनाएको छ ।
मीनराजको जन्म २०३१ फागुन १४ गते भएको थियो । गत असार १३ गते विकास निर्माणका कार्यक्रम अनुगमन गरी फर्केर धनबाङतर्फ फर्किंदा बाङ्गेसल्लामा गाडी दुर्घटना हुँदा उहाँको असामयिक निधन भएको थियोे ।
मीनराजको परिवारमा श्रीमती र तीन छोराहरू रहेका छन् ।
