काठमाडौं, असार १४ । नेपाल कम्युनिस्ट पार्टी (मसाल)ले रुपन्देहीको रोहिणी गाउँपालिका–५ निवासी तथा पार्टीका रुपन्देही जिल्ला सल्लाहकार कामरेड इन्दलप्रसाद केवट (का. कैलास)को ७३ वर्षको उमेरमा असार १३ गते भएको निधनप्रति गहिरो दुःख व्यक्त गरेको छ।
पार्टीका महामन्त्री मोहनविक्रम सिंहद्वारा जारी श्रद्धाञ्जली वक्तव्यमा केवटलाई इमान्दार, कर्तव्यनिष्ठ, अनुशासित र स्वच्छ छवि भएका नेता तथा तराई–मधेशका जनसमुदायमा आदरणीय व्यक्तित्वका रूपमा स्मरण गरिएको छ।
वक्तव्यअनुसार केवटले पार्टीका विभिन्न जनवर्गीय मोर्चामा जिम्मेवारी निर्वाह गर्दै तराई–मधेश जनवादी मोर्चाको केन्द्रीय उपाध्यक्ष तथा पछिल्लो समय रुपन्देही जिल्ला अध्यक्षको रूपमा सक्रिय भूमिका खेलेका थिए। उहाँको निधनले पार्टी आन्दोलन तथा रुपन्देहीको कम्युनिस्ट आन्दोलनमा अपूरणीय क्षति पुगेको पार्टीले जनाएको छ।
पार्टीले दिवंगत केवटप्रति हार्दिक श्रद्धाञ्जली अर्पण गर्दै शोकसन्तप्त परिवार तथा रुपन्देही जिल्लाका सम्पूर्ण पार्टी सदस्यहरूप्रति समवेदना व्यक्त गरेको छ।
