टेकराज भुसाल, सन्धिखर्क ।
गभर्नेन्स ल्याबको आयोजना तथा दलित चेतना विकास परिषद् अर्घाखाँचीको सहजीकरणमा “लैङ्गिक उत्तरदायी तथा समावेशी शासन सुदृढीकरणका लागि सरोकारवालासँग पालिकास्तरीय नीति संवाद कार्यक्रम” सम्पन्न भएको छ ।
सन्धिखर्क नगरपालिकाका नगर प्रमुख कृष्णप्रसाद श्रेष्ठको प्रमुख आतिथ्य तथा भूमिकास्थान नगरपालिकाका नगर प्रमुख झविलाल थापाको अध्यक्षतामा २०८३ असार १२ गते सन्धिखर्कमा सो कार्यक्रम सम्पन्न भएको हो ।
कार्यक्रमलाई सम्बोधन गर्दै सन्धिखर्क नगरप्रमुख श्रेष्ठले लैङ्गिक समानता र सामाजिक समावेशिता सुशासनका आधारभूत पक्ष भएको उल्लेख गर्दै महिला, दलित, जनजाति, अपाङ्गता भएका व्यक्ति तथा पछाडि पारिएका समुदायका अधिकार सुनिश्चित गर्न स्थानीय तह प्रतिबद्ध रहेको बताए ।
नीति निर्माण तथा कार्यान्वयन प्रक्रियामा सबै वर्ग र समुदायको अर्थपूर्ण सहभागिता सुनिश्चित गर्न सके मात्र समृद्ध, न्यायपूर्ण र समावेशी समाज निर्माण सम्भव हुने उनको भनाइ थियो ।
अध्यक्षता गरिरहेका भूमिकास्थान नगरपालिकाका नगरप्रमुख झविलाल थापाले स्थानीय सरकार जनताको घरदैलोको सरकार भएकाले उपेक्षित समुदायको अधिकार सुनिश्चित गर्ने, समावेशी नीति तथा बजेट निर्माण गर्ने र जिम्मेवार स्थानीय शासन प्रवद्र्धन गर्न नगरपालिका सधैँ प्रतिबद्ध रहेको बताए ।
सन्धिखर्क नगरपालिकाका प्रमुख प्रशासकीय अधिकृत प्रमोद खनालले लैङ्गिक उत्तरदायी तथा समावेशी शासन बहुआयामिक विषय भएकाले यसको प्रभावकारी कार्यान्वयनका लागि नगरपालिका प्रतिबद्ध रहेको धारणा व्यक्त गरे ।
कार्यक्रममा गभर्नेन्स ल्याबकी प्रदेश संयोजक राधा अधिकारीले लैङ्गिक उत्तरदायी तथा समावेशी शासनको अवधारणा, स्थानीय तहको भूमिका, नीतिनिर्माणमा नागरिक सहभागिता तथा समावेशी विकासका विषयमा प्रस्तुतीकरण गरे ।
दलित चेतना परिषद् अर्घाखाँचीका अध्यक्ष राधा नेपालीको सहजीकरणमा सम्पन्न कार्यक्रममा उपस्थित सरोकारवालाबिच छलफल गराइएको थियो ।
छलफलका क्रममा सहभागीले स्थानीय सरकारलाई थप उत्तरदायी, समावेशी र नागरिकमैत्री बनाउन यस्ता नीतिसंवाद कार्यक्रम प्रभावकारी हुने धारणा राखेका थिए, साथै स्थानीय तहको योजना तर्जुमा, बजेट विनियोजन तथा सेवाप्रवाहमा लैङ्गिक उत्तरदायित्व र समावेशीकरणलाई अझ प्रभावकारी रूपमा कार्यान्वयन गर्नुपर्ने आवश्यकता औँल्याए ।
