कैलाली । धनगढी उपमहानगरपालिका क्षेत्रका विभिन्न होटलमा गरिएको प्रहरी छापामा २४ जना नियन्त्रणमा परेका छन्।

जिल्ला प्रहरी कार्यालय कैलालीका अनुसार अनैतिक तथा अवैध गतिविधि भइरहेको सूचनाका आधारमा छ होटलमा संयुक्त निगरानी तथा छापा मारिएको थियो। कारबाहीका क्रममा ११ महिला र १३ पुरुषलाई नियन्त्रणमा लिइएको प्रहरीले जनाएको छ।

प्रहरी प्रवक्ता डीएसपी योगेन्द्र तिमिल्सिनाका अनुसार नियन्त्रणमा परेकामध्ये सात जना भारतीय नागरिक पुरुष रहेका छन्। उनीहरूलाई आवश्यक सोधपुछ तथा थप अनुसन्धानका लागि हिरासतमा राखिएको छ।

प्रहरीले होटलहरूमा हुने अवैध गतिविधिमाथि निगरानी बढाउँदै कानुनी कारबाही अघि बढाएको जनाएको छ। घटनाबारे थप अनुसन्धान जारी रहेको र अनुसन्धानपछि विस्तृत विवरण सार्वजनिक गरिने प्रहरीले जनाएको छ।