बागलुङ, असार ७ । बागलुङ प्रहरीले ७ सय ६० ग्राम लागुऔषध (गाँजा) सहित एक जनालाई नियन्त्रणमा लिएको छ।
जिल्ला प्रहरी कार्यालय बागलुङका अनुसार असार ७ गते दिउँसो करिब १२ः२५ बजे काठेखोला गाउँपालिका–५, दरमखानीस्थित मध्यपहाडी लोकमार्गमा नियमित सवारी जाँचका क्रममा एक युवकलाई लागुऔषधसहित पक्राउ गरिएको हो।
प्रहरी चौकी घोडाबाँध, बिहुँको टोलीले शंकास्पद अवस्थामा हिँडिरहेका ताराखोला गाउँपालिका–१ निवासी २४ वर्षीय भीमबहादुर गुरुङलाई रोकी जाँच गर्दा उनले चलाएको ग १२ प ५०६१ नम्बरको मोटरसाइकलको पछाडि झुन्ड्याइएको कालो–सेतो प्लास्टिकको झोलाभित्र गाँजा जस्तो देखिने धुलो पदार्थ फेला परेको प्रहरीले जनाएको छ।
जाँचका क्रममा उक्त पदार्थको तौल ७ सय ६० (७६०) ग्राम रहेको पुष्टि भएपछि प्रहरीले लागुऔषधसहित गुरुङलाई नियन्त्रणमा लिएको हो।
प्रहरीले घटनाका सम्बन्धमा आवश्यक अनुसन्धान अगाडि बढाएको जनाएको छ। यसैक्रममा बागलुङ जिल्ला अदालतबाट पाँच दिनको म्याद थप अनुमति प्राप्त गरी थप अनुसन्धान भइरहेको जिल्ला प्रहरी कार्यालय बागलुङले प्रेस विज्ञप्तिमार्फत जानकारी दिएको छ।
