भरतपुर, असार ९ । चितवनमा जारी राष्ट्रिय स्वतन्त्र पार्टी (रास्वपा) को पहिलो महाधिवेशनमा नयाँ नेतृत्व चयनबारे चर्चा तीव्र बनेको छ। बन्दसत्र सुरु हुन ढिलाइ भइरहेका बेला नेताहरू पदाधिकारी तथा केन्द्रीय सदस्य पदका लागि मत माग्न सक्रिय देखिएका छन्।
पार्टी स्रोतका अनुसार सहमति नभए दुई महामन्त्री पदका लागि झन्डै एक दर्जन नेताले प्रतिस्पर्धा गर्ने तयारी गरेका छन्। हालका महामन्त्री कवीन्द्र बुर्लाकोटी र भूपदेव शाहसहित मनिष झा, शिशिर खनाल, विपिन आचार्य, गणेश पराजुली, यज्ञमणि न्यौपाने र लिमा अधिकारीले महामन्त्री पदमा आकांक्षा देखाएका छन्।
रास्वपा नेतृत्वले पार्टी एकतालाई प्राथमिकता दिँदै सहमतिमार्फत नेतृत्व चयन गर्ने प्रयास गरिरहेको जनाएको छ। सहमतिको जिम्मेवारी सभापति रवि लामिछाने र वरिष्ठ नेता बालेन्द्र (बालेन) शाहलाई दिइएको छ। तर पद सीमित र आकांक्षी धेरै भएकाले नेतृत्व व्यवस्थापन चुनौतीपूर्ण बनेको बताइएको छ।
