काठमाडौं, ६ असार । इरानले हालैको सम्झौता उल्लङ्घन भए त्यसको सम्पूर्ण जिम्मेवारी अमेरिकाले लिनुपर्ने चेतावनी दिएको छ ।
इरानी विदेशमन्त्री अब्बास अराघचीले पाकिस्तानी विदेशमन्त्री इशाक डारसँगको टेलिफोन वार्तामा लेबनानसहित सबै मोर्चामा युद्ध अन्त्य गराउने दायित्व अमेरिकामाथि रहेको बताएका हुन् ।
यसैबीच, अमेरिकी राष्ट्रपति डोनाल्ड ट्रम्पले इरान आफैँ वार्तामा आएको दाबी गर्दै आगामी ६० दिनसम्म इरानले अमेरिकाबाट कुनै आर्थिक सहयोग नपाउने बताएका छन् ।
उता, इजरायल र हेजबुल्लाहबीच युद्धविरामको घोषणा भए पनि तनाव कायमै छ । हेजबुल्लाह प्रमुख नईम कासिमले इजरायली कब्जा स्वीकार नगर्ने स्पष्ट पार्दै हतियार प्रयोग भए कडा जवाफ दिने चेतावनी दिएका छन् ।
यसैबीच, इजरायलले दक्षिणी लेबनान र बेका उपत्यकामा गरेको हवाई हमलामा दर्जनौँको मृत्यु भएको छ ।
अमेरिका र इरानबीच स्विट्जरल्यान्डमा हुने भनिएको वार्ता हाल स्थगित भए पनि कूटनीतिक प्रयास जारी रहेको बताइएको छ । विभिन्न देशहरू क्षेत्रीय शान्तिका लागि सक्रिय भएका छन् ।
