काठमाडौँ, ६ असार । प्रहरीले काठमाडौँबाट स्रोत नखुलेको रु २२ लाख नगदसहित क्रिप्टो मुद्रा कारोबारमा संलग्न दुई जनालाई पक्राउ गरेको छ ।
पक्राउ पर्नेमा नुवाकोटको म्यगङ गाउँपालिका–५ घर भई हाल काठमाडौँको बूढानीलकण्ठ नगरपालिका–६ बस्ने अन्दाजी ४७ वर्षीय तारालाल विश्वकर्मा तथा पर्वतको मोदी गाउँपालिका–७ घर भई हाल काठमाडौँ महानगरपालिका–१६ बस्ने ५० वर्षीय होमबहादुर केसी रहेका जिल्ला प्रहरी परिसर काठमाडौँका प्रवक्ता एवं प्रहरी उपरीक्षक पवनकुमार भट्टराईले जानकारी दिनुभयो ।
उहाँका अनुसार काठमाडौँ महानगरपालिका–२, लाजिम्पाटस्थित एक बारमा अभौतिक (क्रिप्टो) मुद्राको कारोबार भइरहेको भन्ने सूचनाका आधारमा प्रहरी वृत्त दरबारमार्गबाट खटिएको टोलीले उनीहरूलाई पक्राउ गरेको हो ।
उक्त स्थानबाट तारालाल विश्वकर्माले साथमा बोकेको झोलाभित्र लुकाइछिपाइ राखेको अवस्थामा स्रोत नखुलेको नेपाली नगद रु २२ लाख, अमेरिकी डलर ४० तथा दस्तखत गरिएको तर रकम उल्लेख नभएका चार थान चेक बरामद गरिएको प्रहरीले जनाएको छ ।
त्यसैगरी, तारालाल विश्वकर्माले प्रयोग गर्ने मोबाइलमा बाइनान्स (Binance) एपमार्फत करिब २,००० युएसडिटी (USDT) बराबरको क्रिप्टो मुद्रा कारोबार भएको देखिएको प्रहरीले जनाएको छ ।
पक्राउ परेका दुवै जनालाई काठमाडौँ जिल्ला अदालतबाट पाँच दिनको म्याद थप अनुमति लिई थप अनुसन्धान भइरहेको प्रवक्ता भट्टराईले बताउनुभयो ।
