सुर्खेत (वीरेन्द्रनगर), असार २ गते । राष्ट्रिय मानव अधिकार आयोगले कर्णाली प्रदेशको मानव अधिकार अवस्थाबारे सरोकारवालाहरूसँग प्रदेशस्तरीय अन्तरक्रिया कार्यक्रम सम्पन्न गरेको छ।
आयोगका माननीय अध्यक्ष तपबहादुर मगरको उपस्थितिमा सम्पन्न कार्यक्रममा आयोगका सचिव मुरारीप्रसाद खरेल, सहसचिव सम्झना शर्मा लगायतको उच्चस्तरीय अनुगमन टोलीको सहभागिता रहेको थियो।
कार्यक्रममा कर्णाली प्रदेश सभा, न्यायिक, प्रशासनिक तथा सुरक्षा निकायका प्रतिनिधिहरू, मानव अधिकारसम्बन्धी संघसंस्था, मानव अधिकार रक्षक, महिला मानव अधिकार रक्षक, यौनिक तथा लैङ्गिक अल्पसंख्यक समुदाय, द्वन्द्वपीडित, एकल महिला लगायत विभिन्न क्षेत्रका करिब ७५ जना सरोकारवालाको सहभागिता रहेको थियो।
आयोगको कर्णाली प्रदेश कार्यालय, सुर्खेतका प्रमुख रमेशकुमार थापाले कर्णाली प्रदेशको मानव अधिकार अवस्था तथा प्रमुख सवालहरूबारे प्रस्तुतीकरण गरेका थिए। सहसचिव सम्झना शर्माले कार्यक्रमको उद्देश्यबारे प्रकाश पार्दै सहभागीहरूलाई स्वागत गरेका थिए भने कार्यक्रम सञ्चालन मानव अधिकार अधिकृत राजेन्द्रप्रसाद न्यौपानेले गरेका थिए।
अन्तरक्रियाका क्रममा सहभागीहरूले मानव अधिकार संरक्षण तथा प्रवद्र्धनसँग सम्बन्धित विभिन्न विषयमा आफ्ना धारणा, अनुभव र सुझाव प्रस्तुत गरेका थिए। उठाइएका जिज्ञासा तथा प्रश्नहरूको सम्बोधन आयोगका माननीय अध्यक्ष तथा सचिवले गरेका थिए।
कार्यक्रमले कर्णाली प्रदेशको मानव अधिकार अवस्था, चुनौती तथा सुधारका सम्भावित उपायहरूबारे सरोकारवालाबीच अर्थपूर्ण छलफल तथा अनुभव आदानप्रदान गर्ने अवसर प्रदान गरेको आयोगले जनाएको छ।
