काठमाडौं । मुलुकका विभिन्न जिल्लामा खाना पकाउने एलपी ग्यासको अभाव बढ्दै गएको छ। उपभोक्ता र विक्रेताले ग्यासका लागि घण्टौं लाइन बस्नुपरेको गुनासो गरेका छन्।
नेपाल आयल निगमले आपूर्ति सहज बनाउन ल्याएको ‘आधा सिलिन्डर’ नीति (७.१ किलो ग्यास) समस्या समाधान हुनुको सट्टा झन् जटिल बनेको व्यवसायीको आरोप छ। करिब तीन महिनाअघि १५ दिनका लागि सुरु गरिएको यो व्यवस्था अझै कायम रहँदा ढुवानी खर्च बढेको र आपूर्ति प्रणाली प्रभावित भएको बताइन्छ।
पहाडी तथा तराईका जिल्लामा ग्यास नपाइने समस्या देखिएको छ। सल्यान, सुर्खेत, गुल्मी, जनकपुर र सर्लाहीसम्म उपभोक्ताले सास्ती भोगिरहेको गुनासो छ।
ग्यास विक्रेता महासंघका अनुसार कृत्रिम अभाव नभई ढुवानी लागत वृद्धि र आपूर्ति व्यवस्थापनको कमजोरी मुख्य कारण हुन्। आधा सिलिन्डरका कारण ढुवानी दोब्बर महँगो परेको उनीहरूको भनाइ छ।
जनकपुर, गुल्मी र सुर्खेतमा ग्यास आपूर्तिमा ढिलाइ, लागत वृद्धि र माग–आपूर्ति असन्तुलन देखिएको छ। पहाडी क्षेत्रमा त मूल्य अत्यधिक महँगो पर्न थालेको व्यवसायी बताउँछन्।
उद्योगीहरूले कमिसन र ढुवानी भाडा घट्दा व्यवसाय सञ्चालनमै समस्या आएको बताएका छन्। भारतबाट आयात जारी रहे पनि टाढाका जिल्लामा ढुवानी जटिल हुँदा आपूर्ति प्रभावित भएको दाबी छ।
तर उद्योगीहरूबीच तराईबाट भारततर्फ ग्यास तस्करी हुने आशंका पनि व्यक्त गरिएको छ।
यता नेपाल आयल निगमले भने ग्यास अभाव नभएको र आपूर्ति नियमित भइरहेको दाबी गरेको छ। निगमका अनुसार बजारमा माग उल्टै घटेको छ र देखिएको समस्या आन्तरिक व्यवस्थापनसँग सम्बन्धित हो।
विक्रेता महासंघले भने उपभोक्ताले पूर्ण सिलिन्डरको प्रतीक्षामा खाली सिलिन्डर राखेकाले वास्तविक माग नदेखिएको बताएको छ।
हालसम्म ‘आधा सिलिन्डर’ नीति खारेज गर्ने कुनै निर्णय नभएको र पूर्ण सिलिन्डरमा फर्कन ढुवानी तथा आपूर्ति संरचना पर्याप्त नभएको जनाइएको छ।
