काठमाडौं, २९ जेठ । अमेरिका र क्रोएसिया पठाइदिने भन्दै ४० लाख ५० हजार रुपैयाँ ठगी गरेको आरोपमा दुई जनालाई प्रहरीले पक्राउ गरेको छ।
काठमाडौं उपत्यका अनुसन्धान कार्यालयको टोलीले पक्राउ परेकाहरूलाई बिहीबार सार्वजनिक गरेको हो।
पक्राउ पर्नेमा दोलखा जिल्लाको शैलुङ गाउँपालिका–२ निवासी ४५ वर्षीया रुकुकुमारी श्रेष्ठ तथा मोरङको उर्लाबारी नगरपालिका–६ निवासी ३५ वर्षीय शैलेन्द्र शाक्य रहेका छन्।
काठमाडौं उपत्यका अनुसन्धान कार्यालयका प्रहरी उपरीक्षक सरथ कुमार थापा क्षेत्रीका अनुसार रुकुकुमारी श्रेष्ठले अमेरिका पठाइदिने प्रलोभन देखाएर ३५ लाख रुपैयाँ ठगी गरेकी थिइन् भने शैलेन्द्र शाक्यले क्रोएसिया पठाइदिने भन्दै ३ लाख ५० हजार रुपैयाँ लिएको आरोप छ। रकम लिएपछि दुवै जना वैदेशिक रोजगारीमा नपठाई सम्पर्कविहीन भएको भन्दै पीडितहरूले उजुरी दिएका थिए।
उजुरीका आधारमा अनुसन्धान अघि बढाउँदै प्रहरीले उनीहरूलाई काठमाडौं उपत्यकाका विभिन्न स्थानबाट पक्राउ गरेको जनाएको छ।
पक्राउ परेका दुवै जनालाई थप अनुसन्धान तथा आवश्यक कानुनी कारबाहीका लागि वैदेशिक रोजगार विभागमा पठाइएको प्रहरी उपरीक्षक थापा क्षेत्रीले जानकारी दिए।
