काठमाडौं, २९ जेठ । अमेरिकाका राष्ट्रपति डोनाल्ड ट्रम्प इरानविरुद्ध भीषण आक्रमण गर्ने चेतावनी दिएको केही घण्टामै आफ्नो अभिव्यक्तिबाट पछि हटेका छन्।
राष्ट्रपति ट्रम्पले इरानसँगको वार्ता सकारात्मक दिशातर्फ अघि बढेको र उच्च तहमा सहमति जुट्ने अवस्था बनेको जनाउँदै सम्भावित सैन्य कारबाही स्थगित गरिएको बताएका छन्।
सामाजिक सञ्जाल ट्रुथ सोसलमार्फत जारी वक्तव्यमा उनले इरानसँगको वार्ता इरानी नेतृत्वको उच्चतम तहसम्म पुगेको र आवश्यक अनुमोदन प्राप्त भएको दाबी गरेका छन्।
ट्रम्पले लेखेका छन्, “इरानसँगको वार्ता इरानी नेतृत्वको उच्चतम स्तरमा पुगेको र अनुमोदन प्राप्त भएको कुरालाई ध्यानमा राख्दै, संयुक्त राज्य अमेरिकाको राष्ट्रपतिका रूपमा मैले बिहीबार साँझ इरानविरुद्ध गर्ने भनिएको योजनाबद्ध आक्रमण तथा बमबारी रद्द गरेको छु। वार्ता र अन्तिम समझदारीका बुँदाहरू सम्बन्धित सबै पक्षबाट अनुमोदित भएका छन्।”
यसअघि ट्रम्पले इरानविरुद्ध कडा सैन्य कारबाहीको चेतावनी दिएका थिए। तर पछिल्लो अभिव्यक्तिसँगै उनले कूटनीतिक पहललाई प्राथमिकता दिँदै सम्भावित आक्रमण रोकिएको संकेत दिएका छन्।
यद्यपि, ट्रम्पको दाबीबारे अमेरिकी प्रशासन वा इरानी पक्षबाट औपचारिक पुष्टि भने सार्वजनिक भइसकेको छैन।
