मनिला (फिलिपिन्स), २७ जेठ । फिलिपिन्सको मिन्दानाओ टापुको दक्षिणी तटमा सोमबार आएको ७.८ म्याग्निच्युडको शक्तिशाली भूकम्पका कारण मृत्यु हुनेको संख्या ४५ पुगेको छ। राष्ट्रिय विपद् जोखिम न्यूनीकरण तथा व्यवस्थापन परिषद् (एनडीआरआरएमसी) ले बुधबार सार्वजनिक गरेको विवरणअनुसार १७ जना अझै बेपत्ता रहेका छन् भने ४८७ जना घाइते भएका छन्।
एनडीआरआरएमसीका अनुसार भूकम्पबाट ३३ हजारभन्दा बढी घरपरिवार प्रभावित भएका छन्। यसबाट करिब एक लाख ५० हजार मानिस प्रत्यक्ष रूपमा प्रभावित भएका छन्। भूकम्पका कारण अस्पताल, विद्यालय तथा पुलसहित २३८ वटा पूर्वाधार संरचनामा क्षति पुगेको जनाइएको छ।
भूकम्पको कम्पन मिन्दानाओका अधिकांश क्षेत्र तथा मध्य फिलिपिन्सका केही भागमा समेत महसुस गरिएको थियो। मुख्य भूकम्पपछि हालसम्म एक हजार ७०० भन्दा बढी पराकम्प (आफ्टरशक) रेकर्ड गरिएका छन्। प्रभावित क्षेत्रमा खोज तथा उद्धार कार्य जारी रहेको अधिकारीहरूले बताएका छन्।
हताहत, विस्थापन तथा पूर्वाधार क्षतिको दृष्टिले सारङ्गानी र दक्षिण कोटाबातो प्रान्त सबैभन्दा बढी प्रभावित भएका छन्। यी दुई प्रान्तमा करिब सात लाख मानिस बसोबास गर्ने एनडीआरआरएमसीले जनाएको छ।
फिलिपिन्स इन्स्टिच्युट अफ भोल्कानोलोजी एन्ड सिस्मोलोजीका अनुसार स्थानीय समयअनुसार बिहान ७ः३७ बजे ३३ किलोमिटर गहिराइमा भूकम्प गएको थियो। यसको केन्द्रबिन्दु मिन्दानाओ टापुको सारङ्गानी प्रान्तस्थित मासिम सहरको तटबाट करिब ३२ किलोमिटर दक्षिणपश्चिममा रहेको थियो।
