दुबई, २६ जेठ (रासस/एपी) – विश्वकै संवेदनशील समुद्री मार्गमध्ये एक मानिने हर्मुज जलघाँटी नजिक अमेरिकी सेनाको अपाचे लडाकु हेलिकप्टर दुर्घटनाग्रस्त भएको छ। दुर्घटनामा हेलिकप्टरमा सवार दुवै पाइलट सकुशल रहेको अमेरिकी राष्ट्रपति डोनाल्ड ट्रम्पले पुष्टि गर्नुभएको छ।
मङ्गलबार बिहान भएको उक्त दुर्घटना मध्यपूर्वमा बढ्दो तनावका बीच भएको हो। विशेषगरी इरान र इजरायलबीच पछिल्ला दिनहरूमा बढेको सैन्य टकरावले क्षेत्रीय सुरक्षा अवस्था थप संवेदनशील बनेको समयमा यो घटना भएको छ।
इरानको सरकारी सञ्चारमाध्यमले पनि दुर्घटनाको पुष्टि गरेको भए पनि घटनाको कारण र अन्य विवरणबारे हालसम्म कुनै आधिकारिक जानकारी सार्वजनिक गरिएको छैन। अमेरिकी रक्षा मन्त्रालय (पेन्टागन) र सेनाको केन्द्रीय कमान्डले समेत दुर्घटनाबारे विस्तृत प्रतिक्रिया दिन बाँकी रहेको जनाएको छ।
न्युयोर्कस्थित जोन एफ. केनेडी अन्तर्राष्ट्रिय विमानस्थलमा सञ्चारकर्मीसँग कुराकानी गर्दै राष्ट्रपति ट्रम्पले पाइलटहरू सुरक्षित रहेको जानकारी दिनुभयो। उहाँले भन्नुभयो, “दुवै पाइलट सकुशल छन्, कोही पनि घाइते भएका छैनन्। घटनाबारे विस्तृत प्रतिवेदन भोलि सार्वजनिक गरिनेछ।”
दुर्घटनाबारे पहिलो समाचार न्युयोर्क टाइम्स ले प्रकाशित गरेको थियो। पत्रिकाका अनुसार अमेरिकी सेनाको अपाचे हेलिकप्टर अस्पष्ट परिस्थितिमा हर्मुज जलघाँटी नजिक खसेको हो।
विश्लेषकहरूका अनुसार यो घटनाले विश्व ऊर्जा आपूर्तिको प्रमुख मार्ग मानिने हर्मुज क्षेत्र अझै उच्च सुरक्षा जोखिममा रहेको संकेत दिएको छ। इरान–इजरायल तनाव र अमेरिकी सैन्य उपस्थितिका कारण मध्यपूर्वको अवस्था अहिले पनि अस्थिर रहेको उनीहरूको भनाइ छ।
पछिल्ला महिनाहरूमा युद्धविरामका प्रयास भए पनि स्थायी शान्ति स्थापना हुन नसकिरहेका बेला भएको यो दुर्घटनाले क्षेत्रीय सुरक्षा चुनौतीलाई पुनः उजागर गरेको छ।
