काठमाडौँ। सङ्घीय शिक्षण सिकाइ अनुदान शिक्षक केन्द्रीय समितिले आर्थिक वर्ष २०८३/८४ को बजेटमा आफ्ना मागहरू सम्बोधन नगरिएको भन्दै माइतीघर मण्डलामा विरोध प्रदर्शन गरेको छ।
लामो समयदेखि पेसागत निरन्तरता, स्थायित्व तथा सेवा–सुविधासम्बन्धी माग राख्दै आएका शिक्षकहरूले सरकारको ध्यानाकर्षण गराउन प्रदर्शन गरेका हुन्।
समितिका अनुसार सरकारसँग २०७८, २०८० र २०८२ सालमा भएका सहमति तथा सङ्घीय शिक्षा ऐनको निर्णयार्थ पेश गरिएको मस्यौदामा समावेश व्यवस्थापनसम्बन्धी प्रावधानलाई बेवास्ता गरिएको छ। शिक्षकहरूले ६० प्रतिशत आन्तरिक र ४० प्रतिशत खुला प्रतिस्पर्धामार्फत व्यवस्थापन गर्ने सहमति कार्यान्वयन नभएको भन्दै सरकारप्रति असन्तुष्टि व्यक्त गरेका छन्।
हाल देशभर करिब ११ हजार सङ्घीय शिक्षण सिकाइ अनुदान शिक्षकहरू आधारभूत र माध्यमिक तहमा अंग्रेजी, गणित तथा विज्ञान विषय अध्यापन गरिरहेका छन्। उनीहरूले बजेट वक्तव्यमा सम्मानजनक तलबवृद्धि, महँगी भत्ता तथा प्रोत्साहन भत्तालगायतका माग स्पष्ट रूपमा समेटिएको नदेखिएको भन्दै विरोध जनाएका हुन्।
माग सम्बोधन नभए पठनपाठन ठप्प पार्ने तथा सामूहिक राजीनामासमेत दिन बाध्य हुने चेतावनी शिक्षकहरूले दिएका छन्।
यसअघि उनीहरूले हिजो बिहान १० बजे शिक्षा तथा मानव स्रोत विकास केन्द्रको प्राङ्गणमा विद्यालय पोसाक, परिचयपत्र, नियुक्तिपत्र, विशेष नियुक्तिपत्र तथा मार्कर पेनसहित सांकेतिक प्रदर्शन गरेका थिए।
