सिड्नी, २२ जेठ । अस्ट्रेलियाका वन्यजन्तु अधिकारीहरूले ग्रामीण क्षेत्रमा सञ्चालन भइरहेको अवैध साङ्ला–प्रजनन कारोबारको पर्दाफास गर्दै एक लाखभन्दा बढी साङ्ला जफत गरेका छन् । यो कारबाही सिड्नीको पश्चिममा रहेको बाथस्र्ट सहरमा गरिएको छापा मार्ने क्रममा भएको अस्ट्रेलियाको वातावरण विभागले जनाएको छ ।
विभागका अनुसार व्यापारिक रूपमा साङ्ला प्रजनन गर्ने एक व्यक्तिमाथि गरिएको छापामा करिब एक लाखभन्दा बढी अवैध साङ्ला फेला परेका हुन् । उक्त अपरेसन विदेशी कीराहरूको अवैध व्यापारसँग सम्बन्धित रहेको प्रारम्भिक अनुसन्धानले देखाएको छ ।
जफत गरिएका साङ्लामध्ये मेडागास्कर ‘हिसिङ’ साङ्लाहरू पनि रहेका छन् । यी साङ्ला आफ्नो विशेष आवाज निकाल्ने रक्षा प्रणालीका कारण चिनिन्छन् । साथै छेपारो तथा अन्य घरपालुवा जनावरको आहारका रूपमा प्रयोग हुने ‘डुबई साङ्ला’ पनि ठूलो मात्रामा भेटिएको अधिकारीहरूले बताएका छन् ।
फोटोहरूमा जफत गरिएका मेडागास्कर साङ्लाहरू यति ठूला देखिएका छन् कि तिनले वयस्क मानिसको हत्केला नै ढाक्न सक्ने अवस्था रहेको उल्लेख गरिएको छ ।
वातावरण विभागका प्रवक्ताले अस्ट्रेलियाको जैविक विविधता र राष्ट्रिय वातावरण कानूनको संरक्षणलाई अत्यन्त गम्भीर रूपमा लिइएको बताए । उनका अनुसार अवैध रूपमा विदेशी साङ्लाको प्रजनन र व्यापार बढ्दै गएको देखिएकाले घरपालुवा व्यवसाय र उपभोक्तालाई पनि सचेत गराइएको छ ।
विभागले जफत गरिएका साङ्लाहरूको अनुमानित मूल्य करिब एक लाख ४० हजार अमेरिकी डलर अर्थात् करिब दुई लाख अस्ट्रेलियन डलर रहेको जनाएको छ ।
अधिकारीहरूले अब ती जीवित साङ्लाहरूलाई नष्ट गर्ने प्रक्रिया अघि बढाउने तयारी गरेका छन् । वातावरणीय जोखिमका कारण अत्यन्त कठोर मानिने यी कीराहरूलाई नष्ट गर्नु चुनौतीपूर्ण कार्य हुने अधिकारीहरूको भनाइ छ । साङ्लाहरू यति कठोर मानिन्छन् कि तिनीहरू आणविक विस्फोटसमेत सहन सक्ने भन्ने सहरी किंवदन्तीसमेत प्रचलित छ ।
