काठमाडौँ, जेठ २२ । नेपाल कम्युनिस्ट पार्टी (मसाल) का महामन्त्री मोहनविक्रम सिंहले सामाजिक सञ्जालमार्फत एक महत्वपूर्ण राजनीतिक टिप्पणी सार्वजनिक गर्नुभएको छ । सिंहले भारतले रवि लामिछानप्रति देखाएको सद्भाव र सम्मानका पछाडि राजनीतिक उद्देश्य रहेको आरोप लगाउनु भएको छ।
आफ्नो फेसबुक स्टाटसमा सिंहले भारतीय नेतृत्वले लामिछानेलाई दिल्ली बोलाएर सम्मान गरेको घटनालाई सामान्य कूटनीतिक गतिविधि मात्र नभई दीर्घकालीन राजनीतिक रणनीतिसँग जोडेर व्याख्या गर्नुभएको छ । उहाँका अनुसार यसका पछाडि दुई प्रमुख उद्देश्य रहेको हुन हुन सक्छ ।
सिंहको दाबीअनुसार पहिलो उद्देश्य नेपाललाई पुनः हिन्दु राष्ट्रको दिशातर्फ उन्मुख गराउने प्रयास हो । यसका लागि राष्ट्रिय स्वतन्त्र पार्टी तथा भावी सत्ता संरचनालाई समेत प्रभावमा पार्ने रणनीति हुन सक्ने आशंका सिंहले व्यक्त गर्नुभएको छ ।
त्यसैगरी दोस्रो उद्देश्य कालापानी, लिम्पियाधुरा र लिपुलेकसम्बन्धी नेपाल–भारत सीमा विवादमा नेपालको अडान कमजोर पार्दै भारतको पक्षमा सहमति जुटाउने प्रयास हुन सक्ने महामन्त्री सिंहले स्टाटसमा लेख्नुभएको छ ।
सिंहले आफ्नो टिप्पणीमा आगामी दिनमा राष्ट्रिय स्वतन्त्र पार्टी तथा प्रधानमन्त्री बालेन्द्र शाहको भूमिका कस्तो रहनेछ भन्ने विषयले राजनीतिक वृत्तमा विशेष चासोको विषय बन्न सक्ने उल्लेख गर्नुभएको छ ।
उहाँको उक्त अभिव्यक्तिपछि सामाजिक सञ्जाल र राजनीतिक वृत्तमा विभिन्न प्रतिक्रिया आउन थालेका छन् । यद्यपि सिंहले उठाएका विषयमा सम्बन्धित पक्षबाट तत्काल कुनै औपचारिक प्रतिक्रिया सार्वजनिक भएको छैन ।
