गोविन्दकुमार शर्मा, काठमाडौँ ।

अखिल नेपाल स्वतन्त्र विद्यार्थी युनियन (छैठौँ) ले विद्यार्थी सङ्गठन खारेजी विरुद्ध २०८३ जेठ १० गते शनिबार काठमाडौँको माइतीघरमा विरोध प्रदर्शन गरेको छ ।

केन्द्रीय अध्यक्ष सुभाष जिसी, महासचिव पुरन पोख्रेललगायत केन्द्रीय पदाधिकारी तथा सदस्यको उपस्थितिमा सो कार्यक्रम सम्पन्न भएको हो ।

प्रदर्शनमा मन्तव्य राख्दै कोषाध्यक्ष समष्टि बुढाले विद्यार्थी सङ्गठन नागरिकको वास्तविक आवाज भएको दाबी गर्नुभयो ।

सीमाविवाद र राष्ट्रियताको सवाल उठाउँदै उहाँले भन्नुभयो– ‘नेपाली भूमिमा रहेको कालापानी भारतीय तीर्थयात्री र व्यापारीका लागि खुला गरिने तर नेपाली जनता र नेपाल सरकारकै पहुँचबाट टाढा राखिनु लज्जास्पद छ ।’

उहाँले राजा महेन्द्रको पालादेखि बस्दै आएको भारतीय सेना हटाउन र सीमाविवाद हल गर्ने क्रममा सरकारले भारतीय साम्राज्यवादसामु घुँडा टेक्न नहुने आवश्यकतामा जोड दिनुभयो ।

युद्धका कारण पेट्रोलियम पदार्थ महँगिएको बहानाबाजी नगर्न सरकारलाई सचेत गराउँदै बुढाले सरकारले इन्धनमा लिँदै आएको भ्याट, भन्सार शुल्क, पूर्वाधार विकास कर, वातावरण कर र सडक मर्मत करजस्ता अत्यधिक कर कटौती गरी तत्काल महँगी नियन्त्रण गर्न माग गर्नुभयो ।

त्यस्तै, सचिवालय सदस्य सेवक भट्टराईले लामो इतिहास बोकेका विद्यार्थी सङ्गठनलाई सिध्याएर देशमा वैदेशिक हस्तक्षेप बढाउन खोजिएको आरोप लगाउनुभयो ।

उहाँले भन्नुभयो– ‘साम्राज्यवादी शक्तिले नेपालमा युथ काउन्सिल र युथ पायोनियरजस्ता सङ्गठन खडा गरेर सांस्कृतिक हमला गरिरहेका छन् । तराईमा भारतीय सत्ता पक्षका सङ्गठन विस्तार भइरहेका छन् । सरकार तिनलाई रोक्नुको साटो नेपालमा राणा शासन र पञ्चायत ढाल्न लडेका विद्यार्थी सङ्गठनलाई क्याम्पस छिर्न नदिएर प्रतिबन्ध लगाउन खोज्दैछ । यो सरासर निरङ्कुशता हो ।’

भट्टराईले भारतले कालापानी र सुस्ता मिच्दा, देशभित्र मधेसी र दलित समुदायले उत्पीडन भोग्नुपर्दा सरकार मौन बसेको तर आफ्नै देशका भूमिहीन सुकुम्बासीलाई डोजर लगाएर भगाउँदै विदेशी शरणार्थीलाई क्याम्प बनाएर राखेको भन्दै सरकारको राष्ट्रियतामाथि प्रश्न उठाउनुभयो ।

कार्यक्रममा विद्यार्थीले विभिन्न विषयमा नाराबाजी गरेका थिए । विद्यार्थी सङ्गठन खारेजीको निर्णय तुरुन्त फिर्ता गर !, बढ्दो मूल्यवृद्धि नियन्त्रण गर !, भदौ २३ गतेको आपराधिक र भदौ २४ गते देश जलाउने दुवै अपराधीलाई कारबाही गर !, विद्यालय शिक्षा ऐन जारी गर !, टिओबीलाई प्रतिबन्ध गर !, सुकुम्वासीलाई होल्डिङ सेन्टरको नर्कबाट तुरुन्त व्यवस्थापन गर !, अमेरिकी युथ काउन्सिल तुरुन्त खारेज गर !, सहकारी ठगलाई कारबाही गर ! लगायतका नारा लगाएका थिए ।