लिबाङ । रोल्पामा राष्ट्रिय जनमोर्चाले वर्तमान राजनीतिक अवस्था र संविधान संशोधन विषयमा अन्तरक्रिया कार्यक्रम सम्पन्न भएको छ ।
राजमो केन्द्रीय सदस्य कृष्ण खड्काको प्रमुख आतिथ्यमा २०८३ जेठ ९ गते शनिबार सुनिलस्मृति गाउँपालिकाको सुलीचौरमा सो कार्यक्रम सम्पन्न भएको हो ।
कार्यक्रममा अवधारणापत्र प्रस्तुत गर्दै प्रमुख अतिथि खड्काले संविधान संशोधनको सन्दर्भमा राजमोले सङ्घीयताको खारेजी, नागरिकताबारे कडा नीति, दलित र महिलाका लागि निश्चित निर्वाचन क्षेत्रलगायतका विषय संविधान संशोधन बहस कार्यदलसामु दउठाएको स्पष्ट पार्नुभयो ।
वर्तमान सरकारले संविधान संशोधनको नाममा लोकतन्त्र, राष्ट्रियता र धर्मनिरपेक्षतामाथि आँच पुर्याउन थालेको स्पष्ट पार्दै उहाँले २०६२–६३ सालको जनआन्दोलनका पक्षधर शक्तिहरू एकजुट हुनुपर्ने आवश्यकता औल्याउनुभयो ।
नेता खड्काले नयाँ सरकार बनेसँगै साम्राज्यवादी खतरा बढेको धारणा राख्दै देशभक्त शक्तिहरू सचेत हुनुपर्ने बताउनुभयो ।
कार्यक्रममा मूल प्रवाह अखिल भारत नेपाली एकता समाजका केन्द्रीय सदस्य मोहन गिरी र राजमो प्युठानका जिल्ला सदस्य गिरबहादुर गुरुङले मन्तव्य दिनुभएको थियो ।
राजमो रोल्पाका अध्यक्ष मेघनाथ विष्टको अध्यक्षतामा अघि बढेको उक्त कार्यक्रमको सञ्चालन राजमो रोल्पाका हस्तमणि पुनले तथा स्वागत निमकुमार मल्लले गर्नुभएको थियो ।
