काठमाडौँ, जेठ ८ । लुम्बिनी प्रदेश सभाको बैठकमा राष्ट्रिय जनमोर्चाकी सांसद तारा थापाले लुम्बिनी प्रदेश सरकारले प्रस्तुत गरेको आर्थिक वर्ष २०८३/८४ को विनियोजन विधेयकका सिद्धान्त र प्राथमिकताहरूमाथि प्रदेश सभामा तीव्र आलोचना गर्नुभएको छ ।
सांसद तारा थापाले बोल्दै अर्थ मन्त्रालयका कर्मचारीहरूले तयार पारेको ड्राफ्टलाई मन्त्रीले जस्ताको त्यस्तै प्रिन्ट गरेर ल्याएको आरोप लगाउनु भयो । थापाका अनुसार यसमा कुनै नयाँपन छैन र यो केवल विगतकै गल्तीहरूको पुनरावृत्ति मात्र हो ।
‘यो विनियोजन विधेयक पुराना अथवा परम्परागत शैलीमा आएको छ ।’ थापाले अगाडि भन्नुभयो– ‘अर्थ मन्त्रालयमा बसेका कर्मचारीहरूले जस्तो प्रस्तुत गरिदिए, अर्थमन्त्रीले जस्ताको तस्तै प्रिन्ट गरेर ल्याउनुभयो । यो त उद्घाटन नगरीकन समापन गरे जस्तो मात्र भयो ।’
सरकारले कृषि, पर्यटन र उद्योगलाई प्राथमिकतामा राखेको दाबी गरे पनि व्यवहारमा त्यस्तो नदेखिएको सांसद थापाको तर्क छ । गत वर्ष पनि कृषिलाई प्राथमिकता भनिए पनि सबैभन्दा कम बजेट सोही क्षेत्रमा छुट्याइएको भन्दै यसपटक पनि जनतालाई ढाँट्ने काम मात्र भएको बताइएको छ । विशेष गरी औद्योगिक ग्रामहरूको घोषणा कागजमा मात्र सीमित भएको र कार्यान्वयनमा शून्य रहेको पक्षलाई जोडदार रूपमा उठाउनु भयो ।
सिद्धान्त र प्राथमिकतामाथि छलफल जारी रहँदा सरकारले यी आलोचनाहरूलाई कसरी सम्बोधन गर्छ र वास्तविक बजेटमा कस्तो परिवर्तन ल्याउँछ भन्ने सर्वत्र चासोको विषय बनेको छ ।
आज लुम्बिनी प्रदेश, प्रदेशसभाको बैठक आज दिउँसो बस्ने भएको छ । दिउँसो १ः०० बजे बस्ने बैठकमा विनियोजन विधेयक, २०८३ का सिद्धान्त र प्राथमिकता माथिको छलफल हुने कार्यसूची छ ।
शुक्रबारदेखि सुरू भएको छलफलमा १० जना प्रदेशसभा सदस्यले छलफलमा भाग लिनुभएको थियो । बैठकमा प्रदेशसभा सदस्यहरूले समसामयिक विषयमा शून्य समयमा आफ्ना धारणा राख्ने कार्यसूचीमा समावेश रहेको छ ।
