काठमाडौँ । अखिल नेपाल युवक सङ्घको राष्ट्रिय प्रशिक्षणात्मक भेला आगामी साउन २३–२४ गते रुपन्देहीको बुटवलमा हुने भएको छ ।
अध्यक्ष गणेश अधिकारीको हस्ताक्षरमा २०८३ जेठ ८ गते शुक्रबार प्रेसवक्तव्य जारी गर्दै युवक सङ्घले सो जानकारी दिइएको हो ।
जेठ ५–७ गतेसम्म बागलुङ जैमिनी नगरपालिकाको बिनामारेमा सम्पन्न पाँचौँ केन्द्रीय समिति बैठकको निर्णय जानकारी गराउन सो प्रेसविज्ञप्ति जारी गरिएको अध्यक्ष अधिकारीले बताउनुभयो ।
विज्ञप्तिमा अन्तर्राष्ट्रिय परिस्थितिको सन्दर्भमा युद्ध र साम्राज्यवादको विरोध गर्दै राष्ट्रिय स्वाधीनता, आत्मनिर्भर अर्थतन्त्र र राष्ट्रियताको रक्षा गर्नुपर्नेमा जोड दिइएको छ ।
नयाँ सरकार गठनसँगै देशको लोकतन्त्र खतरामा पारेको स्पष्ट पार्दै विज्ञप्तिमा लोकतान्त्रिक मूल्य र अधिकारको पक्षमा दबाब सिर्जना गर्न पहल गर्ने बताइएको छ ।
विज्ञप्तिमा असारको पहिलो हप्ता काठमाडौँमा अन्तरक्रिया कार्यक्रम गर्ने, साउनमा प्रदेशस्तरीय बैठक बस्ने, भदौमा पालिकास्तरीय र असोजमा जिल्लास्तरीय भेला वा सम्मेलन गर्दै यसै वर्षको मङ्सिरमा आठौँ राष्ट्रिय सम्मेलन गर्ने योजना उल्लेख गरिएको छ ।
यस्तो छ, प्रेसविज्ञप्तिको पूर्ण पाठ :
“२०८३ जेठ ५–७ गते बागलुङ जिल्लाको जैमिनी नगरपालिका बिनामारेमा अखिल नेपाल युवक सङ्घको पाँचौँ पूर्ण बैठक सम्पन्न भएको छ । वर्तमान राष्ट्रिय तथा अन्तर्राष्ट्रिय राजनीतिक परिस्थिति, युवाको अवस्था, सङ्गठनात्मक गतिविधि तथा जनजीविकासँग सम्बन्धित विषयमाथि गम्भीर समीक्षा गर्दै महŒवपूर्ण निष्कर्ष तथा निर्णय गरेको छ ।
विश्व राजनीतिक क्षेत्रमा शक्तिराष्ट्रको बढ्दो प्रतिस्पर्धा, विश्वयुद्धको जोखिम, आर्थिक सङ्कट तथा दक्षिण एसियामा बढिरहेको भूराजनीतिक प्रभावले नेपालजस्तो सानो र संवेदनशील मुलुकमाथि दबाब बढिरहेको बैठकले निष्कर्ष निकालेको छ । विशेषत: नेपालप्रति भारत र चीनलगायत शक्तिराष्ट्रको बढ्दो रणनीतिक चासोबिच राष्ट्रिय स्वाधीनता, आत्मनिर्भर अर्थतन्त्र तथा स्वतन्त्र राष्ट्रिय नीतिको रक्षा गर्नुपर्ने आवश्यकता बैठकले औँल्याएको छ ।
बैठकले देशभित्र बढिरहेको महँगी, पेट्रोलियम पदार्थ तथा दैनिक उपभोग्य वस्तुमा भइरहेको बारम्बारको मूल्यवृद्धि, भ्रष्टाचार, कुशासन, बेरोजगारी तथा उत्पादनमुखी अर्थतन्त्रको कमजोर अवस्थाले आम जनताको जीवन अत्यन्त कष्टकर बनेको निष्कर्ष निकालेको छ । वर्तमान सरकारले जनजीविकाका आधारभूत सवाल समाधान गर्नुको सट्टा दमन, नियन्त्रण, हस्तक्षेप र जनआवाजलाई दबाउने प्रकारका निरङ्कुश तथा फासिवादी शैलीका गतिविधि बढाउँदै लगेकोप्रति बैठकले गम्भीर चिन्ता व्यक्त गरेको छ । वास्तविक सुकुम्वासी, श्रमिक, किसान, विद्यार्थी तथा युवाका समस्याप्रति उदासिन रहँदै राज्यसंयन्त्रलाई जनतामाथि दबाब सिर्जना गर्ने माध्यमका रूपमा प्रयोग गर्ने प्रवृत्ति लोकतान्त्रिक मूल्य र जनअधिकार विरुद्ध रहेको बैठकको ठहर छ ।
बैठकले हजारौँ युवा रोजगारीको खोजीमा विदेशिन बाध्य भइरहेको तथा वैदेशिक रोजगारीमा गएका युवाहरू शोषण, असुरक्षा र पीडाको अवस्थामा बाँच्न विवश रहेको विषयमा गम्भीर चिन्ता व्यक्त गरेको छ । स्वदेशमा रहेका युवाहरू बेरोजगारी, निराशा, अराजकता र भविष्यप्रतिको अन्योलबाट पीडित रहेको निष्कर्षसमेत बैठकले निकालेको छ । त्यस्तै सुकुम्वासी, श्रमिक तथा विपन्न जनताको समस्याको दीर्घकालीन समाधान गर्न राज्य असफल भइरहेको तथा जनजीविकाका सवाललाई बेवास्ता गर्ने प्रवृत्ति बढिरहेकोप्रति पनि बैठकले आपत्ति जनाएको छ ।
बैठकले सङ्गठनात्मक गतिविधिलाई अझ सशक्त र प्रभावकारी बनाउने, निष्क्रिय तथा रिक्त पदको पूर्ति आगामी बैठकद्वारा गर्ने, असारको पहिलो हप्ताभित्र काठमाडौँमा समसामयिक विषयमा अन्तरक्रिया कार्यक्रम आयोजना गर्ने तथा महँगी, बेरोजगारी, सुकुम्बासी समस्या र जनजीविकाका सवालमा पालिका तथा जिल्ला तहबाट सरकारलाई ज्ञापनपत्र बुझाउने निर्णय गरेको छ । त्यसैगरी साउन २३–२४ गते बुटवलमा राष्ट्रिय भेला तथा प्रशिक्षण कार्यक्रम आयोजना गर्ने निर्णय भएको छ । साउनभित्र प्रदेश बैठक, भदौमा पालिकास्तरीय भेला वा सम्मेलन तथा असोजमा जिल्लास्तरीय भेला वा सम्मेलन सम्पन्न गर्ने निर्णय गरिएको छ ।
बैठकले युवक सङ्घको आठौँ राष्ट्रिय सम्मेलन २०८३ मङ्सिर महिनामा सम्पन्न गर्ने निर्णय गर्दै अन्य महŒवपूर्ण निर्णयसमेत गरेको जानकारी यसै प्रेसविज्ञप्तिमार्फत जानकारी गराउँछौँ ।”
