काठमाडौं, जेठ ७ । मधेश प्रदेश सरकारको सत्ता समीकरण फेरिने संकेत देखिएको छ । मुख्यमन्त्री कृष्णप्रसाद यादव नेतृत्वको सरकारले विश्वासको मत लिने तयारी गरिरहेका बेला नेपाली कांग्रेस र नेकपा एमालेबीच नयाँ राजनीतिक समझदारी बनेको चर्चा तीव्र भएको छ ।
मुख्यमन्त्री यादवले गत शुक्रबार विश्वासको मत लिने तयारी गरेका थिए । तर जनता समाजवादी पार्टी नेपाल (जसपा नेपाल) का केही सांसदले फ्लोर क्रस गर्न सक्ने आशंकापछि अन्तिम समयमा विश्वासको मत लिने कार्यक्रम स्थगित गरिएको थियो । अब विश्वासको मत लिने नयाँ मिति जेठ ८ गतेका लागि तय गरिएको छ ।
यसैबीच नेकपा एमालेले मुख्यमन्त्री यादवलाई विश्वासको मत दिने तयारी गरेको स्रोतले जनाएको छ । कांग्रेस सभापति गगन थापा र उपसभापति विश्वप्रकाश शर्माले एमाले अध्यक्ष केपी शर्मा ओली सँग भेटवार्ता गरेपछि मधेशसहित सातै प्रदेशको सत्ता समीकरणबारे सहमति बनेको चर्चा छ ।
स्रोतका अनुसार कांग्रेस र एमालेबीच सातै प्रदेशमा सहकार्य गरेर सरकार गठन गर्ने विषयमा समझदारी भइसकेको छ । यसले कांग्रेसभित्र पनि नयाँ सत्ता समीकरणलाई लिएर बहस सुरु भएको छ । पार्टी सभापति शेरबहादुर देउवा ले विगतमा सत्ता साझेदारीका लागि एमालेसँग सहकार्य गरेको उदाहरण दोहोरिँदै गएको भन्दै अहिले गगन थापालाई पनि “देउवाकै बाटोमा” हिँडेको टिप्पणी हुन थालेको छ ।
राजनीतिक वृत्तमा कांग्रेस–एमाले सहकार्यले मधेश सरकार मात्र होइन, राष्ट्रिय राजनीतिमा समेत नयाँ समीकरणको संकेत दिएको विश्लेषण भइरहेको छ ।
