तौलिहवा । राष्ट्रिय जनमोर्चा जिल्ला समिति कपिलवस्तुको आयोजनामा तत्कालीक राजनीतिक परिस्थितिबारे एक दिने प्रशिक्षण कार्यक्रम सम्पन्न भएको छ ।

जिल्लाको गोरुसिङ्गेमा आयोजित कार्यक्रममा पार्टीका महासचिव मनोज भट्टको प्रमुख आतिथ्यता रहेको थियो । भट्टले सो अवसरमा मन्तव्य राख्दै, नेपाली जनता सचेत नभए देश युद्धमा फस्न सक्ने बताउनु भयो । उहाँले अगाडि भन्नुभयो, ‘साम्राज्यवादी शक्तिहरूले आफ्‌नो निहित स्वार्थका लागि नेपाललाई युद्धमा धकेल्ने कोशिसमा रहेका छन् ।’

भट्टले नेपालमा अमेरिकी चलखेल बढ्दै गएको, अमेरिकी सेना र नेपाली सेना बीच ‘पार्टनरसिप प्रोग्राम’का नाममा अमेरिकी सेनाको प्रवेश भइरहेको तथा दलाई लामा र टीओबी समूह नेपालमा सक्रिय भएको उल्लेख गर्दै तिब्बतलाई टुर्क्याउने अमेरिकाको लक्ष्यअनुसार वर्तमान सरकारले काम गरिरहेको आरोप लगाउनुभयो । यसले देशमा संकट बढ्दै गएको उहाँको भनाइ थियो ।

गणतन्त्रवादी तथा संविधान पक्षधर शक्तिहरू एक नभए प्रतिगमन हुन सक्छ : ढुंगाना

प्रशिक्षण कार्यक्रममा प्रशिक्षण दिँदै पार्टीका केन्द्रीय सदस्य राजेन्द्र ढुंगानाले आफूहरूको राष्ट्रियता र गणतन्त्रको रक्षा तथा संघीयता खारेजको मुद्धा कायम रहेको बताउनुभयो ।

ढुंगानाले गणतन्त्र र २०७२ सालको संविधानको रक्षा गर्न गणतन्त्रवादी तथा संविधान पक्षधर शक्तिहरू एक नभए प्रतिगमन हुन सक्ने दाबी गर्नुभयो । साथै उहाँले वर्तमान राजनीतिक परिस्थिति, जेएनजी आन्दोलन, कार्की आयोग, सरकारका अध्यादेश तथा निरंकुश कदमबारे पनि प्रकाश पार्नुभएको थियो।

कार्यक्रममा उठेका प्रश्नहरूमा महासचिव मनोज भट्ट र केन्द्रीय सदस्य राजेन्द्र ढुंगानाले प्रष्ट्याउनु भएको थियो ।

जिल्लाको समग्र राजनीतिक अवस्था, निर्वाचन तथा मत परिणामबारे नेपाल कम्युनिष्ट पार्टी (मसाल) का जिल्ला प्रवक्ता माधव भाट क्षेत्रीले जानकारी दिनुभएको थियो।

कार्यक्रममा राजमो तथा विभिन्न जनवर्गीय संगठनका नेता–कार्यकर्ताहरूको उपस्थिति रहेको थियो। कार्यक्रम रामप्रसाद बेल्बासेको अध्यक्षतामा सम्पन्न भएको थियो भने स्वागत मन्तव्य ऋषिराम शर्माले राख्नुभएको थियो । कार्यक्रमको सञ्चालन केर सिंह अदैले गर्नुभएको थियो ।