काठमाडौँ । बालेन्द्र सरकारको डोजर आतङ्क विरुद्ध छ किसान सङ्गठन र भूमि आयोगका पूर्व पदाधिकारीले ऐक्यबद्धता जनाएका छन् ।
२०८३ वैशाख ३१ गते बिहीबार काठमाडौँको माइतीघर मण्डलामा संयुक्त राष्ट्रिय सुकुम्वासी सङ्घर्ष समितिको धर्ना तथा सभा कार्यक्रममै पुगेर उनीहरूले ऐक्यबद्धता व्यक्त गरेका हुन् ।
सङ्घर्ष समितिका महासचिव अर्जुन कुँवरसँग भेट गरी उनीहरूले सुकुम्वासी तथा अव्यवस्थित बसोबासीको पक्षमा आफूहरूले लगातार सङ्घर्ष गर्दै आएको स्पष्ट पारे ।
सरकारले देशव्यापी रूपमा सुकुम्वासी र अव्यवस्थित बसोबासीलाई बिचल्ली पारेकोमा आफूहरूले त्यसका विरुद्ध सङ्घर्ष पार्ने स्पष्ट पार्दै उनीहरूले सुकुम्वासी सङ्घर्ष समितिसित सहकार्य गर्न इच्छुक रहेको बताए ।
सङ्घर्षप्रति ऐक्यबद्धता जनाउन अखिल नेपाल किसान महासङ्घ (अप्फा) का अध्यक्ष भैरवराज रेग्मी र कोषाध्यक्ष केबी घले, अखिल नेपाल किसान महासङ्घ (क्रान्तिकारी केन्द्र) का अध्यक्ष चित्रबहादुर श्रेष्ठ, अखिल नेपाल किसान महासङ्घका अध्यक्ष बलदेव चौधरी, क्रान्तिकारी किसान महासङ्घका अध्यक्ष सीताराम तामाङ, नेकपा निकट किसान नेता लोकनारायण सुवेदी, किसान नेताहरू भरत फुयाँल, अगस्त चौधरी, रामकुमार कार्की, चन्द्रमान तामाङलगायतको उपस्थिति थियो ।
त्यस्तै भूमि आयोगका पूर्व अध्यक्ष केशव निरौला र हरिप्रसाद रिजाल, पूर्व उपाध्यक्ष नहेन्द्र खड्का, सदस्यहरू भैरवराज रेग्मी र सतनकुमार रेग्मीको पनि उपस्थिति रहेको थियो ।
कुमार कार्की अध्यक्ष रहनुभएको २५ सुकुम्बासी सङ्गठन सम्मिलित संयुक्त राष्ट्रिय सुकुम्वासी सङ्घर्ष समितिले यतिखेर काठमाडौँमा सङ्घर्षको कार्यक्रम सञ्चालन गरिरहेको छ ।
