बुटवल । रुपन्देहीको भूमिहीन, सुकुम्वासी तथा अव्यवस्थित बसोवासीको आन्दोलनप्रति जिल्लाका १२ राजनीतिक दलले ऐक्यवद्धता जनाएका छन् ।
नेकपा (मसाल), राष्ट्रिय जनमोर्चा, नेपाली कङ्ग्रेस, नेकपा (एमाले), नेपाली कम्युनिस्ट पार्टी, श्रमसंस्कृति पार्टी, राष्ट्रिय प्रजातन्त्र पार्टी, नेकपा (माओवादी) सहितका १२ दलले २०८३ वैशाख २९ गते संयुक्त विज्ञप्ति जारी गर्दै ऐक्यबद्धता जनाएका हुन् ।
विज्ञप्तिमा उनीहरूले राष्ट्रिय स्वतन्त्र पार्टी नेतृत्वको सरकारले भूमिहीन, सुकुम्वासी तथा अव्यवस्थित बसोवासीमाथि अमानवीय व्यवहार गरेको भन्दै गम्भीर ध्यानाकर्षण भएको जनाए ।
‘नेपाली जनतालाई सुशासन, शान्ति र सुरक्षित भविष्य दिने भन्दै चुनावका बेला ठुलो आश्वासन दिएर सत्तारूढ भएको बालेन शाह नेतृत्वको सरकारले भूमिहीन, सुकुम्वासी तथा अव्यवस्थित बसोवासीको दीर्घकालीन समाधान नखोजी एकाएक घरबस्तीमा डोजर चलाउने, जबरजस्ती दमन गर्ने, शारीरिक तथा मानसिक यातना दिने एवम् संविधानप्रदत्त बाँच्न पाउने मौलिक अधिकारबाट नागरिकलाई बञ्चित गर्ने अमानवीय कार्य गरेकोमा घोर भर्सना गर्दछौँ’ विज्ञप्तिमा भनिएको छ ।
वर्तमान सरकारको दमनकारी प्रवृत्तिको विरुद्ध भूमिहीन, सुकुम्वासी तथा अव्यवस्थित बसोवासीले गरेको न्यायपूर्ण आन्दोलनप्रति दलहरुको ऐक्यबद्धता प्रकट गरेको विज्ञप्तिमा उल्लेख छ ।
रुपन्देहीमा आगामी जेठ ३ गते देशभरका सुकुम्वासी तथा अव्यवस्थित बसोबासीको राष्ट्रिय भेला र सरकारको विरोधमा वृहत प्रदर्शन हुँदैछ । उक्त भेलाले आगामी आन्दोलनका कार्यक्रम तय गर्ने बताइएको छ ।
रुपन्देहीमा पनि करिब एक लाखको सङ्ख्यामा सुकुम्बासी तथा अव्यवस्थित बसोबासी रहेको दाबी गरिन्छ ।
